無綫上位小生王浩信（Vincent）在事業與情路上皆平坦暢順，但他卻自評只是個演技合格的藝人和分數合格的老公。不過，有人說，人生就是總和力，所以加起來不就是滿分人生嗎？
王浩信2008年拍攝第一部劇集《野蠻奶奶大戰戈師奶》，2013年在《法外風雲》中被謝雪心狠摑24 巴而「成名」，並奪得「飛躍進步男藝員」獎，直至2015年在《樓奴》中首嘗男主角滋味，去年更加是Vincent豐收之年，憑《EU超時任務》的「渠頭」一角大受歡迎，劇集好評如潮，與朱千雪齊獲「最受歡迎劇集拍檔獎」，之後他在《致命復活》中首次獻唱主題曲並得到音樂獎項。而早前播畢的《不懂撒嬌的女人》中，Vincent的「暖男」演出同樣贏盡口碑。
「拍無綫劇好辛苦」
八年時間說長不長，說短不短，不少藝人在娛樂圈默默耕耘一輩子仍打不出名堂，Vincent雖稱不上一步登天，也算是平步青雲，他感激地說：「好多謝觀眾畀咗咁大嘅支持同鼓勵我，拍無綫嘅劇集真係好辛苦，但觀眾畀到我好大動力。」對於有網民指「渠頭」是其心目中的視帝，Vincent笑言是網民的抬舉，但也認同「渠頭」是其代表作之一：「個角色相對係較難演，無論係感情定劇情上，又要講圍頭話。大家對呢個角色比較入心，不過呢啲唔可以歸功於我一個人。知道大家鍾意當然開心，亦都令我愈來愈清楚自己係好鍾意呢行，因為呢個認知，我會投放更多心機同精神去做好。」
談到演技，Vincent謙稱只是合格，仍有待進步，他回想在《樓奴》第一次擔正，他以「演得幾over」來形容：「我嘅性格係咁，大家用五蚊去買嘢，我想畀到十蚊你，係畀多咗，阿媽教落做人要對人寬對己嚴，我想畀得多啲，但最重要係大家睇得開心。」對Vincent來說，沒有特定想挑戰的角色，他追求的反而是入戲深度。
遇偶像變怕醜仔
在眾多敬佩的前輩之中，Vincent首推周潤發， 他又自嘲膚淺，直認當初入行是為了「撞發哥」， 這個心願直至去年才實現：「細個好鍾意睇發哥嘅《英雄本色》，成日幻想如果見到發哥我會點呢，真係好想攬住佢，因為太愛佢！上年拍《踩過界》竟然喺街撞到佢，真係好開心，佢問我：『你嗰六舊腹肌仲有冇操到呀？』又問我圍頭話係咪好難學，我諗佢應該有睇我做嘅《EU》，不過我當時太怕醜，冇攬住發哥。」
堅持每日同YoYo聯繫
事業得意，Vincent的情路亦暢順，與陳自瑤（YoYo）由拍拖、結婚到女兒出世也未遇波瀾。作為老公，叫Vincent給自己打分數時，他認為只是一位合格老公而已，並解釋：「我覺得一個好老公係要擺好多時間喺家庭上，而又能夠好叻咁兼顧到工作，令到大家都好滿足，我認為自己唔能夠滿足到佢哋，因為太多時間放喺工作，每日拍16、17個鐘劇，返到屋企又係睇劇本，每日得幾個鐘休息，返到去佢哋又瞓咗，我精神上唔係好滿足。」
拍親熱戲主動備案
至於夫妻相處之道，Vincent認為在於溝通與互信，最理想是另一半同時是你最好的朋友。即使拍劇日夜顛倒，Vincent仍堅持每天跟YoYo保持聯絡：「我好多嘢都要希望可以『放心』，而呢種感覺都要喺佢身上攞到。」雖然娛樂圈誘惑不少，但Vincent從未受到引誘：「要拍親熱戲嘅話，我事前會同太太講聲，如果佢話唔OK，我唔會做，我會尊重佢。」他揚言夫妻從未遇過任何大矛盾，就算有爭拗也會以平和方法處理，而對家庭百分百放心，亦令Vincent可全力在事業上打拚，難怪他亦自覺是一種任性：「拍《致命復活》時有好多危險動作，我都係親身上陣，仲受埋傷，所以依家會小心啲，不過有幸入到好鍾意嘅行業，我應該要敬業。」
舊「電」Chur到盡
提到另一新作品《踩過界》，Vincent 坦言甚為期待：「喺《踩過界》飾演一個盲眼嘅大律師，真係好難演，要觀眾相信你係有殘障，但仍可以成就到一個咁困難嘅工作，我要同時了解盲人世界同法律界。以前我舊『電』可以用24小時， 但今次用16小時已經盡咗，因為我每一個時刻都要高度集中， 全程係用戰戰兢兢嘅心態去完成，希望畀到觀眾驚喜。」
|
鍾意就快D Share啦！
|
|
|