有之前開日本餐廳的經驗，馬德鐘對新食店充滿信心。
藝人馬德鐘自從約滿無綫後便北上搵人仔，近月他回港重返「娘家」接拍新劇《跳躍生命線》，談及重回TVB的感受，他說：「冇話重唔重返嘅，其實係故事劇本好，近年都喺內地拍戲，如果喺香港，想拍啲香港特色嘅劇，呢部劇係講消防救護員，好有香港特色，所以傾過之後，覺得幾有興趣，咁咪拍囉！」
原來馬德鐘收到好多影迷意見，他說：「香港觀眾覺得好耐冇見到我喇，大陸拍嘅戲又好少喺香港播，自己都想同香港觀眾見面。」不知何故馬德鐘過往多接拍飾演飛機師和警察的角色，而新劇今趟亦飾演救護隊目，咁啱得咁橋，都是制服團隊。
由於難得留港，馬德鐘爭取時間為下月新開張的蠔吧和酒窖執裝修，早年他與家人在尖沙嘴合資經營日本餐廳，如今再接再厲，他再投資七位數在黃埔開蠔吧、酒窖，視生意如湊仔，他笑言似多了三個仔：「自己一向鍾意食生嘢，試過一次過食十隻生蠔，其實喺香港做飲食真係好困難，但又好似上咗癮，自己又奄尖要求高，事事要親力親為好辛苦。」期間他突然變身「裝修師傅」，一時裝燈、一時爬高裝假天花，有途人經過眼望望，他一於少理。
來源 source: http://hk.on.cc
|
鍾意就快D Share啦！
|
|
|