周焯華（洗米華）大仔周柏豪呢期密密見報，sell佢同團隊開發競投購物嘅手機應用程式Oction，今日喺中環舉行發佈會，洗米華夫婦再度合體，洗米嫂陳慧玲(Heidi)現身力撐之餘，爺爺、姑媽同阿妹都有嚟，陣容鼎盛。活動上發生咗少少蝦碌，原本播放一條介紹呢個應用程式嘅片段，不過出咗啲問題，洗米仔識得執生，叫咗佢嘅團隊上台逐一介紹，唔使dead air。至於洗米華同洗米嫂就分開坐，可能礙於太多傳媒在場，故未有特別交流，但囝囝上台介紹個app時﹐佢兩公婆都凝神細聽；到影大合照，兩公婆中間隔住洗米仔同老爺。事後洗米仔講番頭先蝦碌場面，佢話：「其實都唔預料，因為本身綵排嘅時候都好順，點知頭先條片唔啱音同冇聲，惟有執生。」咁識執生，有冇諗過做藝人﹖佢笑住話：「我承諾大家下次做得好啲。」洗米仔話呢個應用程式只係籌備咗兩個月，本月15日啟用，老竇是否提供無限量支持？洗米仔話：「唔係，但佢呢個人係好值得學習，亦好多謝我嘅團隊，佢哋都好辛苦，貢獻咗好多，冇佢哋做唔到。」咁俾意見呢？「唔多，亦唔使出口，感受到佢嘅精神已經OK。」哦…再問洗米仔究竟爸爸有冇課金支持？洗米仔稱：「冇，因為我之前有收入，我哋一共有3個柏檔，合資6位數字，仲有其他公司去做。」提到爸爸同細妹妹前日生日，佢話：「我哋返咗澳門開party慶祝。」由於每次競投，產品價格只會上升1仙，怕唔怕會蝕錢？洗米仔好有自信咁話：「唔怕，係一個新購買模式，希望有啲影響力去改變呢個世界少少。」
| 攝影：陳順禎 | | |
| | | |
| | |
|
鍾意就快D Share啦！
|
|
|
