「佛地Moon」即場驗鼻「翻版湯洛雯」狂晒水着
港姐昨日進行複選，「仙氣李若彤」Kelly繼續狀態大勇，同是大熱的索女「翻版湯洛雯」Nicole打扮斯文，但Ig卻「大解放」晒泳照！17歲卜卜脆的「嫩版李珊珊」Mandy亦不容忽視，高1米73佔優勢。首輪面試有疑似整容佳麗後，昨日再出現一個「佛地Moon」，出奇招在傳媒面前扭鼻證清白。
《2017香港小姐競選》繼上周二舉行首選面試後，61位參賽者進行複選，昨日齊齊現身電視城會見傳媒，部分早於9時許已Set靚頭、化行妝出現康城站，乘坐無綫專車入城。不少參賽者以連身裙上陣，保持港姐斯文大方形象，芸芸佳麗中不乏索女，年僅17歲的妹妹仔及疑似整容的佳麗勇闖選美戰場。
「仙氣」Kelly曲線讚自己
來自加拿大多倫多的「仙氣李若彤」Kelly首輪面試時已令人印象深刻，昨日複選又點少得佢！穿上透視裙的她面對傳媒讚靚女，隨即露出煞食的酒凹笑說：「好開心！（有信心入圍？）當然有嘅。（覺得似李若彤？）都有搵佢嘅相嚟睇，覺得佢好深入民心同好靚。」另一位大熱索女「翻版湯洛雯」Nicole Kam除了與其餘佳麗打成一片、有講有笑外，打扮斯文的她原來內裏Open，社交網不乏去沙灘及游船河的泳裝照，單從泳照來看身材相當出眾，Cup數絕對不可小覷！其中一張照片，她與一名男子親密攬腰，相信已名花有主。
17歲美少女「嫩版李珊珊」Mandy憑着青春無敵殺入複選，透露剛中學畢業，故符合參賽資格。擁有1米73高挑身形的她大晒長腿，揚言選港姐是從小到大的夢想！貌似朱千雪的「白富美」Nicole Wu手執名牌外套到場，問到被指似朱千雪？她即賣口乖：「我覺得佢靚啲！（Ig多咗追蹤者？）麻麻！但上次面試件泳衣就細咗一個碼，今次換件新嘅嚟。」現年23歲的「翻版龐卓欣」Regina Ho以奇特配襯出現，白色及膝裙襯橙紅色手袋，加埋螢光粉紅高踭鞋，果真極品！她面上長「粒粒」兼有黑眼圈，還出現浮粉狀態，有點跌watt，笑言朋友認為她與李亞男較似樣。
「騰雞雪兒」廣東話唔鹹唔淡
「騰雞雪兒」Christina亦有現身，雖然廣東話唔鹹唔淡，但勝在可愛；曾與「十優港姐」麥明詩做過藝訓班同學的杜芷綾（Zoe），大讚勁敵Kelly靚女，又指獲麥明詩短訊祝福，對此麥明詩說：「我同佢講最緊要做自己、要真誠，如果佢入圍都會再約佢分享。佢樣貌、身材都均勻，有信心佢入圍。」上屆「友誼小姐」張寶兒的妹妹張寶欣亦躋身複選。
不少擁有天使美貌的佳麗入圍，但複選中仍有「地獄佳麗」來襲！首輪面試時出現疑似整容的間尺鼻「佛地魔」Angelica，雖然複選已被Out，但卻出現另一位疑似整容的「佛地Moon」！自稱於香港大學中文系畢業的她，鼻位睇落唔多自然，但她否認整容，揚言只是「打鼻影」，更大方讓傳媒任摸唔嬲，又自己捏鼻證天然，認真出位！
文：影視組
|
鍾意就快D Share啦！
|
|
|