前「新聞之花」趙海珠(Alison)，22歲港大畢業後做咗無綫女主播，25歲跳糟做窩輪天后，29歲修畢MBA，識咗現任丈夫Vincent，先後誕下現年4歲半囝囝陳彥熹(Hayden)同1歲囡囡曉霈(Sonia)，Alison幸福滿瀉，曾被人誇讚「生女要似趙海珠」，冇錯，為人父母，當然希望仔女健康幸福，一生無憂無慮，就好似趙海珠一樣......咁其實Alison又點幫佢自己嘅小朋友舖路呢？現時35歲嘅Alison，一對子女人生剛剛起步，Alison自有一套培育理念，佢話：「我哋想佢哋開心，要學習嘅路仲有好長，呢個時候畀佢哋開心啲玩真係希望佢哋有個開心嘅童年，雖然真係好老套......希望佢哋大個諗返轉頭會諗起我哋帶咗佢去邊度玩，而唔係去咗邊個補習班，將來都會希望佢哋識中文、數學，不過慢慢再加啦，o依家呢個時候係去玩，玩都可以學到好多嘢嘅。」今個暑假，身為全職媽咪嘅Alison諗頭多多，令囝囝有個充實嘅暑假，Alison最鐘意就係同囝囝整色整水整嘢食，係親子好節目，Alison話：「平時喺屋企都做好多唔同嘅嘢，暑假要消磨佢哋嘅時間，真係要諗喺屋企可以做乜，除咗睇吓書、開套卡通片睇，都鍾意整吓嘢食，因為囝囝都鍾意嘅，會整吓曲奇餅、鬆餅仔，叫佢攪攪攪、試吓打蛋，已經好開心。」Hayden精力充沛，所以Alison都會搵一啲體力勞動嘅活動畀囝囝，佢話：「佢太活躍，平時同班小朋友一齊畫畫，亦會學中國武術，主要消耗吓佢啲體力。得閒會同學仔出去玩，約play day，總之都係玩同放電。」喺充滿競爭嘅「求學之路」，Alison唔太認同小朋友太細個就有壓力，現時都係主張零學術，佢話：「我哋真係零學術，都有同先生諗過係咪要加少少，但係我哋都覺得學校都學緊學術嘅嘢，平日都係消耗體力為主。我絕對唔係虎媽，主要係畀佢喺活動中學習，之前都有經歷過一個時候係擔心過，會諗乜都唔畀佢學，唔識喎、會唔會好遲？但係我先生同我講遲早都會識㗎啦，亦都怕如果催谷得太緊要會有反效果。」Alison在香港嘅傳統學校升學，老公則是在外國讀書長大，Alison深感自己唔夠創意兼太保守嘅不足，決定畀Hayden報讀國際學校，佢話：「我唔想框死佢，想佢自由發展，主動爭取，自己行自己嘅路。」對於仔女嘅將來，Alison抱住開放態度：「大前提要做好人，唔好做害人嘅事係最緊要，希望佢係自己行自己嘅開心路。」採訪：羅慧敏、懷鈺
攝影：沈健程
攝錄：馮峰、Neo
場地：Kido Town啟道教育城
導師：Pippa Choi@Cakids Fun Kids Club趙海珠同Hayden整嘅朱古力Cupcake
材料(約4個份量)：
低筋麵粉 66克
朱古力粉 10克
蘇打粉 1克
泡打粉 少於1克
鹽 少許
牛奶/黑 朱古力磚 18克
牛油(室溫) 50克
黄糖 26克
蛋漿 33克
Buttermilk(室溫) 75克做法：跟以下次序將材料攪勻。
1. 蛋漿同黃糖
2. 溶咗嘅朱古力磚同牛油
3. Buttermilk
4. 其他所有材料
最後，將攪拌好的材料放入紙杯(約7、8成滿)，再放入180℃預熱好嘅焗爐焗18至20分鐘，即成。
Cupcakes上嘅裝飾用糖膠製成，可以發揮小朋友嘅創意o架！興趣班小資料：
Kido Town啟道教育城「至叻小廚師」
課程時間：逢周六 1小時15分
學費：$280一堂想隨時獲得更多親子資訊，快啲like Easy PaMa Facebook
https://goo.gl/1qWM8g
| (攝影：沈健程) | | |
| | | |
| |
|
鍾意就快D Share啦！
|
|
|