探熱針
傳外遊結婚 蕭正楠黃翠如飛澳洲 鐵粉送機開香檳恭賀
拍拖三年， 40歲蕭正楠和 35歲黃翠如屢傳婚訊，上月被指去倫敦為婚禮場地睇景，蕭正楠話此行更了解女友，大讚她娶得過。上週三（ 30日）又孖住去澳洲，鐵粉送機時更開香檳恭賀，睇怕好事近！
情侶裝出發
由地下情到現在經常公開放閃，蕭正楠和翠如 BB總算修成正果！
由於近期婚訊頻傳，上週三（三十日）蕭正楠和翠如穿黑色情侶裝，齊齊戴 cap帽、孭背囊，襯絕現身機場。二人帶住多箱行李拍拖飛澳洲，一班鐵粉帶埋香檳送機，似是預先慶祝。
再商量婚事
問到那麼多行李，是否順道影婚紗相？蕭正楠笑笑口說：「你過嚟睇吓我啲行李有冇婚紗，啲嘢係公司㗎。」
他指粉絲並非開香檳預祝其婚事：「慶祝《超時空男臣》反應好，遲啲都要同台前幕後再食多幾次飯。」會否趁勢結婚當慶祝？他說：「咁又唔會搵呢啲嘢慶祝，呢啲係更開心嘅事。」會明年拉埋天窗嗎？他笑謂：「真係未知，再商量吓！」
原來他們去澳洲出席 TVB嘉年華活動，寓工作於拍拖，爽！當年兩人拍無綫劇《師奶 Madam》撻着，此行特別與該劇監製李艷芳合照，實行「謝媒」。
唔排除閃婚
其實步入四十歲的蕭正楠一直有計劃組織家庭，直認：「我都想俾佢（翠如 BB）一個家，俾啲時間我諗諗。我知呢個女仔值得珍惜，有時結婚係儀式，愛唔愛，唔會因為結婚而改變，不過人到某個年紀，都要諗呢樣嘢。」但又戲言要等女友做主動：「我都等佢求婚，佢性格好怪，要俾佢做主動。希望快啲，我都唔想等咁耐！」
黃翠如亦笑稱會認真考慮向蕭正楠求婚，更表示：「如果真心愛一個人，作為女仔主動向男友求婚都無所謂。佢話等我求婚，但我都睇佢表現。無刻意去諗閃婚，但又唔會覺得一定無可能。」
蕭正楠收到未呀？
鬥閃
娛圈情侶唔認又認，半公開後又會隔空放閃，你閃他閃大家鬥閃，幸福滿瀉。
馬國明 黃心穎
馬明跟心穎 BB地下情兩年，紙包唔住火，二人終於半公開情侶關係，在內地合作完《宮心計 2》，女方先行公開表示拍了一場最感動嘴戲，打情罵俏又點能夠冇馬明，早前心穎自爆唔識煮飯，他又隔空回應以後要日日食飯盒。心穎為代言纖體廣告做宣傳，又指馬明愛有肉地女友，總之句句有愛。
撰文、攝影、攝錄：娛樂組
|
鍾意就快D Share啦！
|
|
|