囝囝「小春雞」出世後，黎諾懿一有時間就陪住妻兒，樂做湊仔公。
娛頭
五億女婿辛酸史 攞綜援住過劏房 黎諾懿：婚後都冇過得奢華
「五億女婿」黎諾懿跟有米前港姐李潔瑩（ Nicole）結婚三年，跟老婆身家差天共地，不過黎諾懿一直努力搵錢養家，跟屋企人投資車房外，又將升值的元朗近邊境千萬愛巢出售。今年升呢做老豆，在新劇擔正男一愈搵愈多的他，一家三口反而繼續住月租萬八的西貢村屋，擺明應使則使。
原來入行十五年，今年三十七歲的黎諾懿，曾經窮到要捱麵包住劏房，小學時黎父過身，一家人更一度要攞綜援過活，被揭入行發霉日子，他說：我從來唔會睇小自己。
貧富懸殊
黎諾懿在新劇《燦爛的外母》戀上太子女湯洛雯，但卻被準外母家燕姐不時出陰招搞破壞，現實黎諾懿好有外母緣，兒子「小春雞」未出世前，兩公婆經常被拍到跟外父外母食飯行街。但原來二人拍拖初期，黎諾懿得悉女友家底後，曾經想過分手。
「諾懿最初以為 Nicole（李潔瑩）係小康之家，點知去到女友豪宅屋企（君頤峰）嚇一跳，覺得兩個人貧富懸殊，仲諗過分手，當然之後覺得自己咁諗好傻。」身邊人透露。
伊健方中信幫手
事業兩度起跌，初出道有翻版陳百強之稱的他，○三年被安排擔正暑期重頭劇《四葉草》男一，之後再欽點做奧運之星備受力捧，收入大增，篤信風水的他更搬去深井浪翠園屋苑。
○六年拍完《溏心風暴》後，據了解，黎諾懿有頗長一段日子發霉冇嘢撈，被迫三餐捱麵包租住 180呎劏房，老友鄭伊健、方中信期間亦有出手幫他搵工作，力薦給不同電影導演。
棄銀行工入行捱麵包
投閒置散接近一年，有份參演的內地節目《舞動奇跡》出街，外間重新對他留意，工作量逐漸增加，之後捱到上男一拍《愛•回家》，收入穩定。與此同時，跟 Nicole拍拖，感情亦有着落。
「其實諾懿嘅經歷都幾辛酸，老豆好早唔喺度，佢三兄弟同媽咪住喺友愛邨，試過攞綜援，到佢出嚟做嘢，本來喺銀行做會計，人工好，點知佢一意孤行要去讀訓練班學做戲，無綫人工奀，因為咁同阿媽反面，有半年時間去咗朋友屋企做廳長，直至《四葉草》出街，母子先破冰。
「幾年前宣布同 Nicole結婚，啲人叫佢做五億駙馬，結婚上頭嗰晚，見到女家好多嫁妝，自己得幾樣嘢好大對比。但外父外母對佢有信心，反過嚟安慰佢，喺婚宴當晚，外父上台對住賓客為佢平反：『好多人話女婿黐我哋屋企，完全唔係！我亦好肯定佢俾到幸福我個女，我做生意，識睇人。』」知情者說。外父無跌眼鏡， Nicole口中有肩有腰的黎諾懿，一直擔起頭家。
拍《溏心》身家得幾十蚊
有經歷才懂珍惜，做老豆五個月，黎諾懿不單經常將「小春雞」掛在口，更落手落腳做湊仔公。
週日（九月三日），中午，本刊求證他住過劏房一事，他坦承：「讀訓練班係辛苦啲，不過好快過咗，拍《溏心》時係住過紅磡劏房，楊明幫我搵嘅，大約三千幾蚊。我好彩夠生活，未試過借錢，最多一日三餐食麵包，後來拍咗《愛．回家》，生活舒服啲。（做五億駙馬係咪好有壓力？）最緊要係爹哋媽咪知我做緊咩，結咗婚，我生活唔奢侈，好踏實。（會唔會跟外父學做生意？）唔會！」黎諾懿其後再強調：「我從來唔會睇小自己。」
捱過窮，如今有幸福家室，又企穩男一，終於進入人生勝利組。
大哥在 3M做科研 創冇痕掛勾
兒時喪父的黎諾懿，在屯門友愛邨長大，一家曾靠綜援生活，之後黎母做清潔工人辛苦帶大三個仔，黎諾懿三兄弟為脫貧努力拚搏。據悉其兄黎亮昇讀書叻，以獎學金完成在科大的雙碩士學位，之後在大集團 3M做科研。據了解師奶 like爆的王牌家品「冇痕掛勾」及「全效抹布」，是黎諾懿大哥的得意之作。
脫貧後，黎諾懿數年前同兩兄弟合資開車房，原來是為讀汽車維修的胞弟，他曾說：「我同阿哥想支持佢，所以三兄弟夾份開間汽車維修公司，主力係細佬打理，有錢齊齊搵。」
有米老婆 Nicole 佢俾到我安全感
父母擁有億萬美容王國，含住金鎖匙出世的黎諾懿老婆李潔瑩（ Nicole），與另一半背景懸殊，卻無損婚後做幸福人妻。 Nicole說：「我成日話一個男人有冇好老公的潛質，就係睇佢有冇將你放在第一位，佢做到，呢方面佢攞滿分。
有年生日，我搞 BBQ Party，佢燒好晒嘢食俾我同啲朋友，令到大家好開心，之後我的 Friend話：『你個男友冇得頂，好識照顧人。』呢樣我係好感動。」
12年才正式攀上男一，當時搵錢唔多的黎諾懿慳自己，都要將伴侶照顧得妥妥當當。「每次家庭或朋友聚會，佢一定爭住埋單，個人好大方，反而佢對自己好節儉，有時幫佢買吓內衣衫褲，佢就話：『唔好買咁貴，我著佐丹奴都好開心。』有日佢可以大富大貴係 bonus，但佢唔會餓死我，佢一直俾到我安全感。」
李潔瑩稱她的父母好開明，從不干預女兒一切，加上眼見她找到幸福，對黎諾懿這個有骨氣女婿，她說：「呢幾年相處知道佢為人，父母好錫佢。」
型爆外母
現實中，黎諾懿有個型爆的燦爛外母 Elaine，既是幫老公打理美容王國的本事女人，打扮作風亦相當潮。外父外母愛揸辣跑，二人是保時捷跑車的會員，近日便與一班「波子」發燒友到西班牙駕着「波子」環島遊。
黎諾懿的外父外母持有美容王國「儷凝美聚」外，更擁有 15間公司及過億物業，黎諾懿老婆娘家何文田豪宅君頤峰， 07年以七千多萬買入一個複式及一個千呎單位，其中複式單位近年已升至過億，外父外母還持有多個工廈及商廈物業。不靠老婆娘家的黎諾懿，婚後仍租住西貢村屋。
出道似陳百強 試音輸俾黃宗澤
初出道時的黎諾懿，一直被指有陳百強影子。據知，當時無綫希望旗下藝人能歌、視兩棲發展，故安排他與黃宗澤到環球唱片及東亞唱片試音。黎諾懿外形夠晒，可惜歌藝麻麻，連他私下亦笑自己五音不全，在各種因素下，最後由一心想做歌手的黃宗澤跑出，成為東亞唱片 08年的新人，並推出首張 EP《 In Love With Bosco》。
撰文、攝影、攝錄：娛樂組
|
鍾意就快D Share啦！
|
|
|
