掃呢頁CODE去手機

2017年9月7日 星期四

善長銀碼見真心 [壹週刊 - 1435 - 財經] __,M1,

「天鴿」吹襲澳門,暴露了過去十多年開放賭權後,整個澳門只是「金玉其外」。中環人語善長銀碼見真心颱風「天鴿」一巴掌摑醒賭王及賭后,搵大錢之餘都要嘔番啲出 ...






「天鴿」吹襲澳門,暴露了過去十多年開放賭權後,整個澳門只是「金玉其外」。

中環人語

善長銀碼見真心

颱風「天鴿」一巴掌摑醒賭王及賭后,搵大錢之餘都要嘔番啲出來做公益慈善;不過捐款的確是一門藝術,呢份善心都要睇到肉與否;學得美國總統 Donald Trump捐一百萬美金予受颶風「哈維」影響之災民,其發言人強調「 his own money」咁招積就知!

一眾過江龍之中,以何猷龍反應最快攞頭彩,但未見有其個人捐款,家姐何超瓊殿後,吊詭是上市公司美高梅中國( 2282)與母公司及何小姐合共三千萬善款並沒有分拆開,致電其公關也不肯透露何小姐捐出善款之銀碼,呂志和今鋪被鬧到「掛彩」話佢反應遲緩,個人即豪捐六千萬,計及公司及家族總共捐一億二千萬。洋人最透明,金沙老闆 Sheldon Alderson清楚講明上市公司及家族基金所捐之銀碼共六千五百萬元。

區議員經營時鐘酒店

昔日九龍塘時鐘酒店乃是恩客與舞小姐「食糖水」之勝地,風光年代「媽媽生」要快人一步去霸住啲酒店房,讓舞小姐「開工」,自己從中抽佣;到了近年土地問題,導致年輕人「扑嘢都冇地方」,時鐘酒店發揮緩衝作用。最近有幾十年歷史的德雲小築及財神酒店招標出售,前者業主是國際的士有限公司,何許人也?其族長李均於六、七十年代因為啟德機場飛機噪音,把九龍塘大宅轉做時鐘酒店,聽講佢同華探長幾熟落,冇皇氣照住又點做的士及時鐘酒店生意?活躍於灣仔區嘅李均創辦鵝頸橋街坊福利會,好肯做公益慈善事業,其子李流錫做金融業,是歷任灣仔區議員,去年李均仙遊,自然要賣物業分身家!





德雲小築已有四十多年歷史,現正招標出售,門口有道帆布簾遮擋私家車,私隱度高。





李流錫(紅圈)活躍於灣仔區,也是成立於一九五五年之香港公民協會主席,擔任公共關係委員會主席。

中環寸嘴 楊國佳:香港「冇輪用」





楊國佳

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。





原本屬香港特色的波鞋街,又被市建局閹咗。

當年仿效倫敦個摩天輪 London Eye(倫敦眼),喺中環海濱搞摩天輪,現時新舊營運商交接唔到,正式「屎友」,呢個叫香港「死眼」!政府仲喺度臭屎密冚,搞到就嚟「冇輪用」!令香港成為一個國際鬧劇中心!啲外資營辦商 label香港營商環境非常惡劣,香港只不過淪為全世界最大的唐人街而已,呢鋪真係鬼佬心態入唐人街「獵奇」!

另一單睇到香港「屎波」,係前身為土發嘅市建局,同新世界搞「波鞋街」重建項目又走數,之前應承興建「體育名人館」冇影,對外開放空中花園變咗平台花園,被踢爆後就喺商場整個鋪仔替代體育名人館,深信近廁所位,人流夠多!呢啲就係唐人發展商同鬼佬發展商之別,唔顧自己 goodwill。發展商同市建局合作之後,小心佢再𡁻埋短期利益,好似長實同土發合作嘅中環中心,幾年前向長實子公司追討$2,300萬收地開支,連李澤鉅咁識計數嘅人都在法官面前呻,狂轟土發不但惡冇大冇細,仲話同佢做生意好痛苦,令白髮增多!在此奉勸新世界 Adrian哥,千祈唔好歷史重演!

中華游樂會夠晒八卦

大家經過大坑中華游樂會,唔知有冇留意呢間老牌會所嘅 logo與別不同,唔似得啲西人會所咁整幅公仔加幾隻拉丁文(香港哥爾夫球會有朵洋紫荊同條龍,另加 FESTINA LENTE二字,即係快中有序,無謂急),而係上卦為「乾」、下卦為「離」之天火同人卦。呢個卦有乜微言大義?

話說中華游樂會係何啟爵士喺辛亥革命前夕倡議成立,至今已有過百年歷史。既以中華為名,擺到明係針對西人大班之香港會。香港會嘅 logo有 COMMUNE BONUM兩隻拉丁文,即係公益咁解。咁中華游樂會點過招?一切盡在不言中,以同人卦應對。卦辭曰:「同人于野,亨。利涉大川,利君子貞。」意思係與人和同於曠野,心胸寬闊、大公無私。其寓意當然係勝過西人兩隻拉丁文何爵士番書仔一名,竟然曉得用《易經》過招,唔講得笑也。





位於大坑的中華游樂會,由何啟爵士倡議成立,昔日霍英東和何鴻燊喜歡到游樂會打網球較勁。





中華游樂會以同人卦為標誌,勁過香港會(右)之 COMMUNE BONUM多多聲。


鍾意就快D Share啦!