提起李亞男當日抽筋入院情況，可想而知祖藍當時幾咁慌張。
探熱針
全身抽筋 呼吸困難 李亞男驚恐症入院 王祖藍心痛：我以為佢會死
結婚兩年，王祖藍給另一半最好，經常有影皆雙，更把過億豪宅給老婆李亞男獨自持有。只因愛妻號，都經歷過以為失去另一半的時候。
王祖藍忙北上吸金，婚後初期李亞男不時獨守空闈，抑鬱情緒不穩，在家會無端狂喊，更試過兩度入院。其中年初她驚恐症突爆發，抽晒筋兼呼吸困難，祖藍心痛：「以為心臟病發會死，我好驚！」
好似隨時窒息
李亞男婚後兩度入院，第一次是腸胃有事，當時祖藍身在內地拍劇集《哪吒》。
「亞男會無啦啦一個人喺屋企喊，入院嗰陣我唔喺佢身邊，佢喊得好勁！」祖藍說。自此，他不再接劇，只返內地做綜藝節目，抽多點時間陪住老婆。
接受輔導的李亞男，情緒慢慢穩定下來，但今年初她被驚恐症突襲。
「佢飲咗少少酒同咖啡，心跳得好嚴重，以為心臟病發，成個人抽筋，呼吸困難。我見到佢都覺得好恐怖，飛車送佢去醫院，覺得佢好似隨時窒息咁！」祖藍憶述。
同醫生 say sorry
情況嚴重，但向來照顧別人多於自己的李亞男，仍努力令大家放鬆。祖藍扮她雙手屈曲抽筋樣說：「醫生問佢點，佢話抽緊筋郁唔到，好似閃電咁，話自己好似《雷神》。醫生話要幫佢抽血，佢話我好想俾你抽，但我停唔到，唔好意思醫生，我唔係有心令你咁難打針，一個病人去到咁嘅情況仲咁好禮貌，呢個就係我老婆。」
在病榻交帶一切
未能止住抽筋，亞男在病榻上仍掛心祖藍冇人照顧。令心痛過後的祖藍，更體會沒什麼比老婆感受更重要。「佢抽抽吓筋話，你聽朝要返工，有冇人叫你起身，打俾助手 set番鬧鐘，你套衫擺咗喺第三格櫃桶""有咩辦法唔愛呢個老婆。」幸好醫生指亞男只係偶發情況，此後亦再冇發生。
在港日子，祖藍幾忙碌都堅持收工回家享受住家飯，重視夫妻的每分每秒。
「依家趁佢返加拿大探親或拍嘢，我就喺公司做通宵，佢一返香港我就早啲收工返屋企食飯，食完飯落樓下打羽毛球。」 A
我沒變
由屋邨仔到富貴，王祖藍最深刻體會，是被硬套變質的罪名。「你有咗錢或名，好易俾人話你變咗，呢個罪名好易加在你身上，有時聽到會唔舒服，我又未去到完全唔講道理，但點解唔直接問我，點解咁揣測或咁樣睇我！除咗老婆，家人中阿媽係最明白我嘅一個。」
鄧萃雯走人 黎瑞恩唔簽 王祖藍：唔想因為工作冇朋友做
北上撈得掂，有指王祖藍名字等如人民幣。由演員到自組山頭做老闆，去年成立經理人公司「手工藝」，記者會上晒冷旗下人強馬壯的十多位藝人，包括花旦徐子珊、視后鄧萃雯、羅霖、殿堂歌手杜麗莎、黎瑞恩，還有林欣彤等。
但近日盛傳最先動筆簽祖藍的老友鄧萃雯決定走人。早前雯女向外放聲氣，指跟擅長做綜藝的祖藍方向唔夾，會回巢返大台拍劇。同雯女合作一年就拜拜，求證祖藍，他直認不諱：「雯女係決定唔留，佢自己開 workshop，我覺得 OK嘅，和平分手。我唔想因為工作令大家冇朋友做，呢樣我好介意。」除咗雯女，黎瑞恩亦唔再簽，他說亦預計陸續有藝人離場。
再簽朋友有顧慮
不合則分，他強調跟雯女仍是好朋友。「當初佢問有冇興趣合作，依家佢走都好有心，喺 WhatsApp留咗廿分鐘留言安慰我，亦坦承提出我公司一啲問題，係客觀嘅。」
旗下藝人大部分是朋友，有否感到公私難分，影響管理？「係㗎！你簽咗好多朋友做 artist，似請咗好多屋企人開工。最初簽我時，大家都會話冇所謂，冇咩要求，但做咗一段日子，發現唔係咁喎！繼續落去會點，形成壓力，所以我成日鼓勵佢哋要開心見誠攤開講。有人走同時都有人問我簽唔簽佢，吸收經驗，我會比以前更慎重考慮，衡量能唔能夠幫到佢先簽。」
我不等如人民幣
感到吃力不討好？「放咗藝人走，會唔會俾人覺得我唔掂？老實講，我真係做得麻麻哋，我認咪得囉！唔會覺得冇面，我唔介意放人走，因為唔想似以前 TVB嗰種觀念。訪問我講過歡迎藝人隨時解約，大家唔夾寧願早啲完，因為我只想佢更好。
間公司本來諗住簽我同老婆，後來其他朋友叫到，諗住幫得就幫，當初睇輕咗呢個工作(經理人)，之後發現我根本照顧唔到咁多，而另一問題係大家諗住嚟公司就開拓到大陸市場，但其實唔係咁簡單，上到去真係刀光劍影。加上受制不明文額制，國內競爭大，要好多個人條件配合，開拓內地市場唔係容易。反而喺內地我簽咗好多人，比較順利。」
撰文：娛樂組
攝影、攝錄：黃志明、葉志明
|
鍾意就快D Share啦！
|
|
|
