探熱針
揀鑽石籌款拍賣關心妍望開音樂治療中心
關心妍去年誕下囡囡楊榮心（ Jovia）後做全職媽咪，一直未有復出打算，但近日她為情緒及抑鬱病者，甘願動身。成立了「妍亮生命慈善基金會」的她，眼見近年青少年或患情緒病自殺的個案大增，決做關注工作，於十二月舉行慈善籌款晚宴，希望籌到三至四百萬資源費，開音樂治療中心，做埋導師，幫助情緒病人找到出路。
朋友捐紅酒名畫
上週四（二日），關心妍在老公楊長智陪同下到中環揀鑽石，勿以為她揀禮物自用，其實是為十二月的慈善籌款晚宴揀拍賣品。原來為人母的她，對近年連接有學生自殺個案觸動心情，決放低全職媽咪生活，做關注情緒病、抑鬱症者的工作。
由找演藝界朋友為慈善活動呼籲，到搵贊助商，阿 Jade一腳踢。當日獲鑽石集團的支持，阿 Jade說：「我戴住呢隻耳環及一條頸鏈會喺當晚拎出來拍賣，到時都搵咗專業拍賣官，我都希望可以拍賣到一個好好嘅數字。」
除有鑽石商贊助拍賣，為慈善碌盡人情咭的她，亦得朋友捐出名貴紅酒和名畫等，阿 Jade統籌之餘，亦做當晚其中一位表演嘉賓，不過一個人的力量有限，她還需要二十個天使援手。「我需要 recruit二十位天使陪我一齊做呢個表演，呢個月會揀二十個朋友，希望佢哋可以報名捐錢，一齊去鼓勵情緒抑鬱嘅朋友。」
助年輕人找方向
去年「妍亮生命慈善基金會」成功獲政府發「非牟利慈善團體牌照」，一直以關注邊青及有困難、低收入家庭的年輕人為主，直到近年發現多宗因情緒病而衍生的悲劇發生，極其心痛的 Jade不想袖手旁觀，故決定為幫助別人「復出」！
「近排見到社會好多不幸事件，好多悲劇，決定同另一機構「全康澄心」一齊喺十二月搞一個「妍亮生命重新站起來」慈善晚宴，希望可以幫助到一啲患上抑鬱、情緒病嘅朋友、邊青同學生，希望佢哋可以重新企番起身。」
Jade感激演藝界朋友幫忙呼籲，希望屆時可籌到三至四百萬元增設資源，開設音樂治療中心，是她的終極目標。她說：「我哋希望除咗輔導中心之外，可以開一個音樂治療中心，到時我可以幫手教埋，讓年輕人佢哋可以搵到一個新方向，唔使成日喺度鑽牛角尖，選擇輕生。
撰文：攝影：娛樂組
|
鍾意就快D Share啦！
|
|
|