熱爆娛樂: 嫌返工困身吳卓林辭工專心瘟女 [壹週刊

2017年11月9日星期四

嫌返工困身吳卓林辭工專心瘟女 [壹週刊 - 1444] __,卓林,吳綺莉,吳卓林,M1,

卓林同加拿大籍女友 Andi拍拖快將一年，早前二人拖到實去淺水灣沙灘拍拖。

探熱針

嫌返工困身吳卓林辭工專心瘟女

現年 17歲的吳卓林自從宣布出櫃，戀上 30歲外籍女友 Andi，身為阿媽的吳綺莉當然唔高興，兩母女關係又轉趨惡劣，經常日嘈夜嘈鬧大交，卓林更索性離家出走同女友租北角劏房同居！沒有吳綺莉經濟上支援，卓林不惜輟學，打工賺萬五蚊月薪養埋無業鬼妹女友，可惜平時習慣阿媽照顧的卓林，返工唔夠兩個月就嫌困身，於是辭職收場！日前，卓林拖實女友 Andi現身淺水灣沙灘拍拖，雖然同行仲有鬼妹友人做電燈膽，但都無阻卓林同女友癡纏，現時戀愛大過天的卓林，真係天不怕地不怕。

未過試用期

吳卓林與三十歲網紅 Andi愛得轟烈，戀愛大過天的卓林，邊個阻止都冇情講！為了擺脫吳綺莉日日逼他們分手的魔掌，卓林更索性停學兼離家出走，同女友租住北角劏房過二人世界，剪了一頭剷青短髮的卓林更於 Ig貼相公告「 I'm Gay」，宣布出櫃！

原本為了生活的卓林，在完全零工作經驗下經女友介紹，以月入萬五蚊在一間製作公司做攝影師，以為可以自力更生，唔靠阿媽都可以自己闖一片天，點知返工唔夠兩個月，據知卓林已主動辭職。

「起初卓林好鍾意份工，因為佢一向都好鍾意影相，工作賺到錢之餘又可以發展佢嘅興趣，但係工時長兼困身，搞到佢少咗時間陪女朋友，所以做唔夠兩個月，連試用期都未過就辭職，雖然唔做長工，但卓林話間中有 freelance俾佢做佢都會接！聽佢講過話嚟緊想去旅行放鬆吓，之後有咩返嚟先再諗！」知情人士透露。

吳卓林公告出櫃，更在 Ig po出同網紅女友 Andi合照晒恩愛。

卓林經常含情脈脈望實女友。

兩人在沙灘中旁若無人攬到實。

朋友事後亦有在 Ig分享由卓林操刀的相片。

卓林多角度幫同行女性友人影泳照留倩影。

向朋友展示自己作品。

卓林同女友 Andi喺公園傾到雞琢唔斷。

同行另有鬼妹友人做電燈膽，三人行圍埋食煙吹水。

沙灘拍拖

孖住女朋友一齊做無業遊民，不過他們依然無有怕，繼續日日糖黐豆黐到實。十月二十八日，戴着白色 cap帽的卓林踢住拖鞋同女友 Andi去淺水灣沙灘拍拖，同行還有一位外籍女友人，三人先去附近公園圍埋坐低食煙吹水，之後就齊齊行落沙灘漫步。

當日 Andi有別平日低胸性感作風，着晒長褸兼素顏上陣做跟得女友，而卓林就攝影師上身拎住手機幫換上三點式泳衣的女性朋友在海邊喪影寫真，仲非常專業幫對方多角度捕捉影相，影影吓見女朋友 Andi被冷落坐喺一邊發呆，卓林即主動行去攬實 Andi，二人旁若無人頭貼頭睇日落，羨煞旁人！

自從卓林同 30歲鬼妹 Andi拍拖後，同媽咪就常起衝突。

女友 Andi除咗經常性感打扮，同卓林一樣都係「煙民」

Andi 30歲生日時，在網上晒出一張著住長褸的相，卻被吳綺莉暗寸對方外套都係由自己益 Andi。

為咗融入阿女世界，吳綺莉曾經「擔煙」俾卓林食，嘗試同卓林以朋友方式相處。

兩母女關係飄忽

卓林同女朋友愈來愈愛，但係同阿媽關係又再度變差，吳綺莉家中近日發生疑似閉門失竊，報警稱損失十七萬元財物，事後女兒吳卓林亦承認曾回家取物件，但就話事前有發短訊通知媽咪，對於媽咪報警行動充滿問號。

其實吳綺莉兩母女互報警鬧上差館已經唔係第一次，在一五年三月及今年三月，吳綺莉曾經先後被女兒兩次以涉毒、虐待兒童及疑刑事恐嚇報警，令相依為命十幾年嘅兩母女關係陷入僵局，直到今年六月，二人關係曾經一度緩和，吳綺莉更高調接卓林返家團聚，不過問題依然未解決，隨着卓林搭上外籍女友 Andi，經常帶佢返屋企過夜，二人仲匿埋喺房成日都唔出門，吳綺莉同阿囡再起衝突，日日發功逼卓林同女友分手，為逃避阿媽煩功，卓林就索性再度離家出走孖女友 Andi租住北角劏房同居。

「其實 Elaine（吳綺莉）真係好錫卓林，一個女人自己養大個女真係一啲都唔容易！佢仲曾經講過自己為咗個女可以咩都唔要，可惜佢唔係好識點樣同個女溝通，成日有咩急起上嚟佢就淨係識得鬧，個女咁大個點會聽佢支笛呀，整整吓卓林就覺得阿媽好煩，乜嘢都管住晒，又乜嘢都唔俾佢做，識咗 Andi之後就更加覺得媽咪連佢識咩朋友都要管，惟有離家出走抗議！不過卓林一走咗， Elaine又覺得好大打擊，同人講到喊晒，話自己唔識做人阿媽，我哋聽到都覺得好心噏，點解佢哋兩母女好哋哋會搞成咁！」吳綺莉身邊好友透露。