網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2017年11月9日 星期四

中環劏豬櫈破咒 [壹週刊 - 1444 - 財經] __,M1,

盧永仁除咗事業往績受注目外,已婚嘅佢花邊新聞都多籮籮,包括曾經被拍到同前有線主播劉明軒「關係密切」,喺私竇見面。中環人語中環劏豬櫈破咒麥肯錫出身嘅盧永 ...






盧永仁除咗事業往績受注目外,已婚嘅佢花邊新聞都多籮籮,包括曾經被拍到同前有線主播劉明軒「關係密切」,喺私竇見面。

中環人語

中環劏豬櫈破咒

麥肯錫出身嘅盧永仁博士,早年曾經被起咗個朵,叫「中環劏豬櫈」。有得呢個朵,當然絕非浪得虛名!佢搞過互動多媒體服務公司,蝕數億。三千萬入股正奇( 336),蝕四千萬。做海域非執董,公司爆煲。入 I.T大幅擴展業務,點知盈利大跌七成兼要辭職走人。一一年入咗南華傳媒,一四年就離開。廿年來做過約十間公司高層,命途相當坎坷。





由 Kidsland主理的香港首家 LEGO官方旗艦店上年喺朗豪坊開幕,今年七月仲開多間喺銅鑼灣添!

最近終於有好消息降臨佢身上。佢擔任公司董事、副主席及財務總監的凱知樂( Kidsland),申請到掛牌上市。呢個中國玩具代理龍頭,銷售廿七個國際玩具嬰兒產品品牌,當中包括極受小朋友歡迎嘅玩具 LEGO!香港就有兩間店。而公司過去三年都有盈利,市值十二億至十七億元,集資最多四億四千萬,本週五上市。盧永仁手頭都有 3%股份估值五千多萬。睇嚟「中環劏豬櫈」今次靠「童子」成功破咒噃!

本週圖片搵錢民間智慧

香港土地問題人所共知,連炮台山 Citi Bank門口都被佔據。商販瑟縮一角,將一對又一對嘅鞋排山倒海展示,更加自備膠鈎,將出售嘅袋掛喺銀行玻璃門。呢種搵錢嘅民間智慧,會唔會係 Citi Bank下一個宣傳靈感?

翁靜晶阿媽好猛料

釋心慧同釋健釗蜜遊夏威夷,尼姑仲著住比堅尼露股曬太陽,上星期爆出,全城嘩然,兩個人都係澳門菩提禪院管理人,咁啱踢盡佛門醜聞的翁靜晶,佢媽咪曾經係釋健釗同釋心慧虔誠信徒。翁靜晶話:「今次事件最大打擊係我媽媽。因為佢哋係媽媽好親切的導師,都捐獻咗唔少錢。呢啲都唔緊要,最重要係心好傷。」佢仲話:「我媽媽係澳門人,我哋喺澳門有什麼大小事,多數都是搵佢哋。包括死後的法事,各樣東西。」查實翁靜晶母親趙小瑜本身好猛料,跟隨兩代賭王葉漢和何鴻燊搵食,人稱「澳門大家姐」,佢曾形容母親係「江湖中人」。翁靜晶話:「做賭業會接觸很多不同的人,包括很有錢的人,或者來自基層的人。」翁靜晶家陣咁鬼硬淨,原來都係「虎媽」催逼而成,佢話:「媽媽叫我打電話俾某人,佢只會講一次電話號碼,如果你記唔到電話號碼,要再問佢,佢會答多你一次,但態度唔慌好,若果再問第三次,你真係大劑!」





翁靜晶(左)同媽咪(右)個樣有八成相似,性格都一樣咁「強」。

此情可待成追憶

識曹貴子醫生嘅金融人,都話佢近來很憔悴,相當唏噓。屋漏兼逢連夜雨,本身係佢旗艦嘅康宏環球( 1019),最近被佳兆業( 1638)大股東郭英成兒子郭曉群,密密掃貨,持股達到 29.91%,成為公司大股東。對方近日要求召開特別股東大會,罷免曹貴子等八名董事。做到咁高調,真係天王都無面俾!佳兆業曾於一五年爆出債務危機,更因公眾持股量不足而被停牌,當時得到「玩具大王」蔡志明出手,持股至 5.21%,先令公眾持股比例回升。另一邊廂,蔡志明同曹貴子亦相識多年,當初曹貴子由醫生轉戰商界,正正是多得蔡志明賞識,二人仲共同持有康健國際( 3886),齊齊搵食。而家呢個三角關係,有無暴露到友好變化嘅玄機呢?





原本只係於沙田行醫嘅兒科醫生曹貴子,近年同好友活躍於股壇。





蔡志明同曹貴子關係曾經非常友好,後者更向傳媒透露,係因為幫蔡志明睇症而結緣。

超人孫女曝光有玄機





誠哥(右一)開開心心帶住孫女(右二)同商鋪業老手任永賢(左二)等人同場睇馬。

剛剛過去星期日乃跑馬日,馬場貴賓廂房除咗傾馬仔,仲零舍多人傾另外一個話題,就係上星期首富李超人罕有出現馬場廂房,仲要帶埋佢位金叵羅大孫女李燕寧出席,吸睛程度勁過樓下拉頭馬班馬主。事關李首富家族經歷大富豪一役,變得極度注重私隱及安全,平日見人都成班保鑣圍住,第三代返學亦有保鑣跟隨,正式陪太子讀書。平時第三代放假亦鮮有喺香港四圍去,出外食飯都只係去長和旗下嘅酒店居多。以往每年全家去拜祭超人亡妻,第三代都戴晒口罩,樣貌從未曝光。今次發現大孫女原來咁省鏡,打入女神榜睇怕無懸念咯。查實呢張爺孫相有景轟,因為明顯唔係偷影,而且好多媒體都有,坊間盛傳乃超人好友流出來,但試問邊會有超人好友咁沙膽,未得佢老人家首肯便些牙開去,故此發相人是誰依然木宰羊。後來又有超人針話孫女未入過馬場,所以阿爺帶乖孫去見識吓,根本冇約任何人喎。有口痕友就話,大孫女今次曝光似乎早有準備,不排除將來會再有機會露面,鋪路俾第三代加入公司。

雷蛇陳總怕粉絲上門挑機





陳民亮讀法律出身,但因沉迷打機而走上創業路,現時公司市值已超過百億港元。

講開李首富,順勢講吓佢有份投資,下星期一上市嘅電競股雷蛇( 1337)。話說所有喺香港上市嘅公司,根據公司法條例,必須在招股書刊登所有董事局成員嘅住所地址。但雷蛇創辦人兼主席陳民亮卻獲證監會罕有地批出豁免,無需公布住址。雷蛇話陳總係電競界達人,擁有唔少粉絲,知名度遠遠超過其他股東及投資者,擔心一旦公開佢屋企地址,會令陳總及其家人安全有問題。據消息人士講,陳總喺老家新加坡確係風頭躉,行街經常被人要求合照,所以都係小心為上,以防有人上門搵陳總挑機。


鍾意就快D Share啦!