釋心慧至今都仲未現身親自解畫。
八卦陣
比堅尼露股
釋心慧：人在做天在看
上期《壹》仔封面，踢爆寶蓮寺高僧釋健釗同釋心慧，成 pair情侶咁款暢遊夏威夷，釋心慧著埋比堅尼露股曬太陽，鄰居仲話聽到男女怪聲。事情發展至今，寶蓮寺上下一齊封口，住持淨因大和尚更充耳不聞，冇眼屎乾淨盲，釋心慧同釋健釗更係雙雙深潛，連自己有份搞嘅「佛你跑」活動，都唔出席啊。
釋心慧近日轉戰微信朋友圈，仲大吐苦水，多次轉發「長輩文」，指「人在做天在看」。佢挺起胸膛咁講：「做人要撫心自問！天地良心。」又話「外界搞風搞雨，無影響平靜生活""」，講到好委屈咁。
佢事後刪除晒自己 fb所有相簿，大家再睇唔到呢位「佛教旅遊界 KOL」嘅分享。不過憤怒嘅信眾依然群情洶湧，喺釋心慧 fb洗版，要求「早已還俗的心慧女士，回應所有人的查詢」，仲貼埋《壹》仔嘅報導。《壹》仔誠邀釋心慧專訪兼親自解畫，希望你盡快出嚟面對信眾。
二千萬佈道會陳帆波叔力撐
今個月尾，將會舉行一個基督教嘅「盛事」，叫做「 2017福音盛會『主愛臨香江』佈道大會」。呢個佈道會認真唔嘢小，搞足七場，預計要花成二千萬元，即係平均每場就要使近三百萬元。
撐場人物都大有來頭㗎，前財政司長梁錦松同前政制及內地事務局長譚志源，都幫手拍宣傳片，到時仲會上台分享。阿松更喺片中抽自己水，扮係譚志源司機，先被問：「阿松，乜你都返教會呀？」再被問：「係咪上次買車衰咗，所以信耶穌㗎？」阿松就澄清，唔係因為咁先信主。
大會最近又搞咗個「主愛臨香江」福音餐會，但唔係俾一般人去㗎，連大會網頁都冇提呢個活動，不過政商界名人都有去，除咗譚志源，仲有財政司長波叔、運房局長陳帆、前商經局長蘇錦樑、同埋爭緊做廠商會長嘅吳宏斌等。
香港最近奪得二○二二年同志運動會主辦權，成為亞洲首個主辦城市，預計帶嚟十億元嘅經濟收益。特首林鄭就被批評至今未有表態支持，不過佢兩個手下都支持「主愛臨香江」，雖然佢唔係基督徒，但睇嚟都幾支持呢個「盛會」。
區議員鬧爆外訪嘥五十萬公帑
每名區議員外訪，都會獲政府發放一萬蚊津貼，如果外訪有助佢哋工作，本身冇問題。但因為外訪，似乎為區議會增加咗唔少矛盾。好似灣仔區議會最近計劃外訪日本，考察大阪市議會同養老院等地方，點知因為機票同收唔齊錢嘅問題，最終搞唔成，小組主席仲辭埋職添。
沙田區議員都出現外訪爭議，該區區議員陳國強話，佢哋區議會同其他區議會一樣，準備全體議員去外國考察，但問題係仲未決定考察內容，就先決定地點，計劃去新加坡考察五日。
根據規定，區議會同轄下嘅委員會，可以前往香港以外地方進行職務訪問，但有關外訪活動，必須同區議會工作有關。陳國強就話，到依家都未知考察內容係乜，就要議員投票選定地點，根本係浪費公帑，應該取消外訪。
陳國強估計，今次外訪要使五十萬公帑，而且外訪嗰五日，全沙田同馬鞍山嘅市民，都唔會搵到任何一個區議員幫手。佢認為新加坡冇乜考察價值，不如去台灣睇吓反對黨同政府關係好過，仲喺會議上提出過，不過就冇人理佢。
民建聯亂抽水支持者都插
一屆立法會開波之後，拉布戰不斷，泛民同建制就政府提出、無約束力嘅一地兩檢議案過招。雙方打緊硬仗期間適逢萬聖節，民建聯唔知邊位，好有心咁整咗張 poster似乎想揶揄泛民議員，點知最後搞到連支持者都批評。
張 poster係萬聖節中午民建聯喺 fb發帖，上面寫住「邊個係人，邊個係鬼，一睇就知」，底部就有泛民議員包括朱凱廸、楊岳橋同陳淑莊等六個人，被改圖到好似鬼咁嘅樣， fb post就寫上「嚇我唔到嘅！你哋唔使扮啦，慳番！」
朱凱廸第二日就一地兩檢議案喺立法會發言時，劈頭就反擊話其實睇落自己係人，但被民建聯燒緊、折磨緊；又舉例話好多市民唔想見到高鐵西九龍站實施一地兩檢，但建制派就火速推動緊，相信市民都有被折磨嘅感覺。佢之後喺 fb出 post話：「係人係鬼，市民有眼睇。」
無錯㗎，唔少市民真係有眼睇，留言批評民建聯連普通一個開心嘅節日，都唔放過用嚟攻擊政敵，「唯獨畫風幼稚……肯定會引嚟廣大市民嘅恥笑。」有支持者都忍唔住講出心聲，話泛民的確好乞人憎，但不得不佩服人哋真係好齊心，建制就相反，一有少少事就拿拿臨割席。
撰文:巫不言
|
鍾意就快D Share啦！
|
|
|
