熱爆娛樂: 獨家脫離李澤楷 6年梁洛施同四眼新歡狂啜 33啖 [壹週刊

2017年11月9日星期四

獨家脫離李澤楷 6年梁洛施同四眼新歡狂啜 33啖 [壹週刊 - 1444] __,李澤楷,梁洛施,M1,

四眼男揸住 Isabella隻手又啜又聞，足足嘴咗 33啖。

娛頭

獨家脫離李澤楷 6年梁洛施同四眼新歡狂啜 33啖

○九年，年僅二十歲的梁洛施（ Isabella）成功得到李澤楷寵幸，為李家誕下骨肉轟動全城。翌年再誕下一對孖仔，可惜關係只維持四年便告吹。童話夢碎， Isabella帶住三子隱居多倫多。曾經是李澤楷的女人，加上湊住三個囝囝，背景特殊的 Isabella，與李澤楷分手六年，甚少被發現身邊有異性，但最近終於有男人敢埋 Isabella身，上月廿八日，本刊直擊 Isabella與一名年約四十歲四眼新歡現身圓方，拍拖睇戲兼消夜直落，兩人更公然在餐廳暗角調情。其間 Isabella主動出擊，伸手摸男友塊面，男方又捉番實佢隻手又錫又聞，臨走時兩人隔住囗罩嚟個 goodbye kiss，四眼男仲啜到合晒眼面都凹埋，表現得好享受！本刊全程直擊整個過程，發現他們短短兩小時， Isabella總共被男友狂啜 33啖。

唔敢張揚

坐擁超過三百四十億身家的李澤楷，自從一一年同 Isabella劃清界線，「楷女郎」排住隊上場，去年被踢爆同一五年港姐季軍、現年二十五歲的郭嘉文密遊日本，女方更瞬間「飛上枝頭」，一炮過以一億買入九龍塘逸瓏天池屋，成為上等人。

雖然 Isabella係過氣「楷女郎」，不過手揸三張王牌（三個囝囝），所以仍然得到小小超無限量照顧，為免得失長期飯票， Isabella都識做將戀情低調處理，約會當日非常小心，先派出兩名保鏢沿路把風，全程的士出入，而且大部分時間都戴住囗罩。

「自從有咗三個仔， Bella基本上大部分時間都俾晒啲仔，就算而家有拖拍，佢都係安頓好啲小朋友等佢哋瞓咗覺，夜晚先出去，咁其實 Richard（李澤楷）都唔會唔俾佢拍拖嘅，只係一切以三個小朋友行先，同埋唔好太高調就得喇。」 Isabella身邊人透露。

同李澤楷分手六年， Isabella最近終於有仔埋身。

睇吓 Isabella呢個冧爆嘅笑容，就知佢幾享受

一杯黑啤兩份飲，交換口水。

玉手俾男友又捽、又嘴、又聞， Isabella都表現得好受落。

臨走時，兩人隔住口罩 goodbye kiss，四眼男肉緊到合晒眼，面都凹埋。

睇戲撐枱腳

試過兩次復出撻 Q， Isabella近年修心養性，全副精神湊仔，難得有愛情滋潤，今年二十九歲的 Isabella回春變到十足十初戀少女，全晚一副含春樣。晚上九點，笠住口罩的 Isabella拖住四眼新歡現身圓方戲院，著住淺藍色連身短裙、孭背囊，打扮極之樸素，而四眼新歡穿着恤衫西褲，手上戴住價值三十三萬一千的 Patek PhilippeNautilus手錶。其間保鏢一直遠距離把風，兩人十指緊扣急步入場。

避免行蹤曝光，散場前十分鐘，兩人提早離場。離開戲院時約十點半，商場內店鋪已關門，見人少少兩人開始放下戒心，大模廝樣拖住手 fing吓 fing吓，久旱的 Isabella仲時不時流露冧爆笑容，就算隔住個口罩都遮擋唔到。

睇完戲趁商場鋪頭已關門，兩人大模廝樣拖住手 fing吓 fing吓。

四眼男手上戴住 Patek Philippe Nautilus手錶，價值 31萬 1千（小圖）。

31萬 1千

肉緊錫手

行到去一間露天西餐廳，二人揀咗室內位坐低，餐廳燈光昏暗，見食客唔多， Isabella使開保鏢後終於除低囗罩。四眼男負責發辦，叫咗薯條同鷄翼，嘢食未到， Isabella同男友先來一輪眼神交流，然後 Isabella主動伸手愛撫男友塊面，男方又乘機捉番住對方隻手，兩人再定格對望，四隻手在四眼男面上肉緊交纏捽來搓去，男方之後再將 Isabella對玉手放在鼻上出力吸索，就算嘢食嚟到，兩個依然唔肯放手，用單手食嘢，真係睇見都戥佢哋攰！

當晚約九點，兩人十指緊扣步入戲院睇戲。

套戲未散場，兩人先行離開，之後在商場搵嘢食。

入餐廳坐低後，兩人開始調情， Isabella主動伸手摸男友塊面。

隔囗罩嘴

差唔多半夜一點， Isabella收到電話走先，仲 call定相熟的士。

食鷄翼食到油淰淰，嘴都未抹的四眼男忍唔住出擊，又捉住 Isabella隻手先捽一輪，將體溫傳到落對方手上，然後再將手放近嘴邊不斷狂錫，連啜幾啖之後又放在鼻上聞，仲要陶醉到流露高潮眼，四眼男這些舉動無嚇親 Isabella之餘，她更表現得好受落，一味對住男友甜笑。之後四眼男再 order兩杯黑啤，自己飲完一啖再遞俾 Isabella，之後你一啖我一啖，交換口水，而且全程他們兩隻手都冇分開過。食到尾聲，四眼男終於肯放低 Isabella隻手，成餐飯 Isabella都冇嘢落肚，只係食了兩條薯條，鬆開手唔夠三分鐘，兩人又再 give me five然後又再十指緊扣。差唔多半夜一點， Isabella收到電話夠鐘要走，呢個時候兩名保鏢又出現 standby，四眼男負責埋單， Isabella就戴番口罩，臨走前又眼定定望住男友，難離難捨之際， Isabella終於要起身走人，兩人嚟個 goodbye kiss，雖然隔住口罩，但四眼男依然好肉緊，啜到面都凹埋，本刊全程直擊整個過程，經過點算後，發現四眼男當晚總共錫了 Isabella三十三啖。

分開走

等 Isabella安全離開，四眼男先上的士鬆人。

離開「安全區」， Isabella馬上進入戒備狀態，急急腳行去附近酒店，仲 call定相熟的士，拿拿臨上車走人，等 Isabella安全離開，四眼男施施然行去另一邊商業大廈截的士，其間保鏢發現記者並通風報信，四眼男見勢色唔對，加快腳步上的士鬆人。

獲准返港

自從同李澤楷分手之後， Isabella三母子長期留在加拿大生活，有工作才會返回香港，今次返香港李澤楷亦知情。

「其實 Bella同 Richard（李澤楷）一直都有緊密聯絡，三個仔啲嘢，佢哋都有商有量， Bella都跟足李家作風去湊仔，好樸素，唔會亂使錢喺佢哋身上，而且教得三個仔好乖， Richard都好放心啲仔交俾佢湊。」梁洛施身邊人說。

眨吓眼已經八歲的大仔李長治，論神情同樣子，都愈大愈似老豆，簡直係「 mini版小小超」，難怪深得阿爺李嘉誠歡心，唔想同三粒孫仔分隔兩地，阿爺下旨要 Isabella母子返港定居，有消息指仲安排三粒孫仔入讀全港最貴的弘立書院。

「其實今年年頭， Bella同對孖仔已經返咗嚟，長治就留喺多倫多讀埋半個學期，六月放暑假先同 Bella媽咪返嚟，啲小朋友都好快適應到香港生活，所以都會留喺度長住，最開心梗係爺爺啦，隨時可以見到啲孫仔。」梁洛施身邊人透露。