落貨,在幕前殺氣騰騰，現實為兩餐的標哥，能放下演員身段，幫手搬運一箱箱海鮮去魚檔。
探熱針
TVB御用收數佬兼職賣魚
見親佢出場，唔係惡霸、收數佬上身，就係演債主！
在電視機見慣見熟，近年更被網民稱為「大台收數佬」的綠葉，他的名字：黃文標。
一二年離開效力廿三年的 TVB，轉投開不成的港視，三年來靠積蓄過活，演員份工難搵食，唔會放棄幕前的黃文標，寧願兼職賣魚謀生，保住演活惡霸的一團火。
兼職賣魚一年
早前在《使徒行者 2》客串演惡霸，再引起網民注意的綠葉王黃文標，上週三（十一月一日）中午，揸住貨 van，由香港仔魚市場出發，駛去牛頭角街市送貨。五十五歲的他由司機到落貨乜都要做，魚檔職員或買餸的街坊見到綠葉王在街市工作並不驚訝，只因在幕前專演「收數佬」的他，現實中兼職魚佬已有一年。
「最初現身魚市場或街市，都會有人問：『你過嚟賣魚呀？』我話打份工啫！試吓無乜所謂。有啲仲以為係電視台嚟偷拍。」黃文標說。
一片綠葉，話晒都係演員，現賣魚維生，別人目光成為心理關口。他說：「只係怕觀眾以為我轉咗行啫！拍戲仲係正職，只不過正職一個月開工幾日，呢份兼職每月有廿日工開。」為生活，其實邊份正職，邊份副業都不重要。
過港視使盡積蓄
見他在《使徒行者 2》出現，觀眾以為黃文標仍是 TVB藝員，其實一二年他已離開無綫轉投港視。最後港視不獲續牌，自由身的三年，黃文標積蓄使盡，單靠拍內地網劇及客串電影，當然不足維持生計。
徬徨嗎？「我份人無乜計劃，我相信喺香港有手有腳就可以生活，你肯做就得啦，所以冇徬徨過。」
有日黃文標在街市落貨，有個女孩走過來跟他說：「我好鍾意睇你做戲㗎！」對於一個綠葉，呢一句簡直如荒漠甘泉。
定型等同肯定
「佢問我：『你唔拍戲喇？』我話唔係，只不過無工開咪嚟幫吓手。佢話好鍾意睇我做戲，跟手仲同我影相，我真係好開心。有人問我介唔介意咁多年被定型做惡霸？大台咁多人，能夠定到一個位置，我覺得已經好好。起碼幾百個藝員中，想搵收數佬第一或第二個就諗起我，即係話呢類角色我交到戲，係一個肯定。」黃文標說。
惡霸係皮匠
外形粗獷的黃文標，原來有一雙做針黹皮匠的巧手。三年前為興趣自學做皮革，一針一線他親手做出的皮匠手袋，深受朋友圈歡迎。
撰文、攝影：娛樂組
|
鍾意就快D Share啦！
|
|
|
