甩拖即有劇冇女，惟有專心工作！（設計對白）
探熱針
38歲崔建邦中佬喪操
崔建邦（ Amigo）與林珊珊細女李怡「野人」拍拖近兩年，上星期宣布分手，再見亦是朋友。甩拖冇女， Amigo的起心肝搵錢。入行 18年，近日他終被安排入劇組劇做演員，在新劇《兄弟》中飾演拳手，隨時要剝衫騷肌，唔想比下去的他，把握時間地獄式訓練喪谷，踩過界做演員唔衰得。
與側田遊泰國
上星期， Amigo與女友「野人」分別在 Ig宣布分手。據知兩個多月前甩拖的 Amigo，即孖老友側田及圈外男友人，於上月到泰國旅行，散心兼叉電。「 Amigo同野人拍咗拖年幾，不過兩個磨合唔到，最後都係要分開，好彩仲可以做番朋友。趁佢未開劇，阿田又未開騷，大家約埋一齊去泰國叉吓電，玩咗幾日。 Amigo話自己都三十八歲喇，嚟緊會正式搞間小型嘅製作公司，趁單身專注做嘢。」有知情者說。
又拉又舉又跑步
本週一（六日），在銅鑼灣見到 Amigo，急步行去登龍街 V Point的一樓 Eliment Fitlax，原來約了健身教練上堂。在教練協助下，又拉又舉個多小時，見他的表情，似乎操得幾吃力。操完儀器， Amigo與教練轉戰室外，落街跑步。以為他在銅鑼灣附近跑幾個圈收工，點知由銅鑼灣跑上司徒拔道，再跑落跑馬地馬場跑圈，搏晒老命。
臨老拍劇
入行十八年， Amigo早年犯過唔少錯，鑊鑊新鮮鑊鑊甘，不過隨着人漸長，又吸取教訓， Amigo變得踏實，加上他身邊有不少貴人扶持，俾機會他重生。
杜之克睇佢
「其實 Amigo一世人都幾有運，至少佢喺呢行有唔少貴人幫佢，衰過咁多嘢，仲可以喺 TVB生存，依家連杜之克都好睇佢，俾機會佢轉型拍劇，撈多一瓣，提升價值。」 Amigo身邊友人說。據知， Amigo自覺臨老轉型做演員，故為十二月開的新劇《兄弟》，幾乎每日都喪操。「入行咁耐都係靠把口搵食，連 Amigo都笑自己臨老先嚟拍劇，啱啱先同馬德鐘拍完《跳躍生命線》做救護員，十二月中就演拳手，之前參加過職業拳賽，不過佢冇再 keep，肥番晒！點知公司安排咗呢個角色俾佢，趁一支公依家大把時間，咪想喺短時間內操爆肌肉，始終近排好多男藝員，好似袁偉豪、王浩信都露過，唔想比下去。」有知情者說。
四大貴人
在娛圈打滾 18年的崔建邦，入行前做過洗頭仔、旅行社領隊，後來在港台做兼職製作助理，不過命中註定有貴人的他，無論起步抑或經歷高低，貴人總會常在他左右。
陳志雲
有指崔建邦在港台任職幕後時，被當時以藝名韋家晴做節目的陳志雲視為寵將，安排他入無綫。陳志雲在 TVB位高權重期間，崔建邦事業亦扶搖直上，由主持捧到做當紅金牌司儀。不過 10年陳志雲惹上官非被停職，有指崔建邦被迫轉投恩師對頭人樂易玲，因而被指是「迷雲黨」叛將，不過近年兩師徒已冰釋前嫌。
余詠珊
09年崔建邦因接連發生涉毆打女友鄺敏慧，駕駛被罰停牌期間再涉嫌揸「大膽車」，一錯再錯令事業一鋪清袋。 11年他由金牌司儀被貶做劇組 PA(助理編導)，由低做起。經過一年「勞改」，遇上回朝掌管綜藝科的余詠珊，對方下特赦令，放生崔建邦重返幕前，成為他第三個貴人。
古天樂
崔建邦做 PA期間，搞過製作公司另謀出路，有指好友古天樂不但介紹人脈給他， 15年崔建邦為一個觀塘商場搞開幕活動，古仔更做剪綵嘉賓。有指崔建邦以一條龍服務收客人五百萬酬勞，而古仔只以友情價現身，呢個貴人擺明塞錢俾兄弟賺。
撰文：娛樂組 攝影：蕭敬漁、李溢敏
|
鍾意就快D Share啦！
|
|
|
