雖然阿銘嚟唔到黨慶，但係就寫咗封信俾黨友。
八卦陣
黃浩銘「逃獄」現身社民連黨慶
上星期六晚，社民連十一周年黨慶，主席吳文遠好 high咁宣布，社記破紀錄筵開八十六席。黨慶固然開心，但其實今年社民連受嘅打擊都幾大。唔單只黨內唯一立法會議員長毛被 DQ，吳文遠上個月尾嘅「三文治案」普通襲擊罪成，正保釋等候上訴，加加埋埋十二個行委會成員入面，一半坐緊監或者面臨監禁。
副主席黃浩銘坐監三個幾月，但星期六竟然「出席」黨慶。原來為咗等佢唔好缺席，社記成員整咗個阿銘人形紙板公仔出嚟，出席者喺開席前更加大排長龍，就係為咗同「阿銘」合照。吳文遠話，之前黨慶有阿銘搞氣氛又周圍同人飲酒，所以仲帶埋「阿銘」上台，一齊祝酒。
黃浩銘亦以「不畏威權繼續燃燒」為題，寫咗封信賀社記黨慶。佢承認今年係「社民連有史以來最艱苦的一年」，「我們今天從事的每個抗爭，也是承載着對後世的關懷愛護，不欲自己長大的地方沉淪，就要持守希望，努力奮鬥。」
佢仲話喺獄中每日閱讀學習、不停鍛鍊身體，為咗出番嚟之後，可以更強壯咁同黨友並肩作戰。
尖啤五萬蚊賀社記斥李飛「莫名其妙」
社民連黨慶有泛民人撐場唔出奇，毛姨姨、慢必、朱凱廸、羅冠聰同戴耀廷都有出席。上年黨慶，前主席陶君行飲到 high high哋，台上講笑大嗌「民主黨，賣香港」，又話「民主黨，正契弟」，搞到林卓廷黑面走人。今年民主黨都叫俾足面，雖然林卓廷冇嚟，但劉慧卿、何俊仁同許智峯都有到場，拍賣嗰陣仲買咗幅字畫。
當晚仲有個重量級人馬嚟咗，就係「尖啤」劉夢熊喇！拍賣籌款嗰陣，坐主家席嘅尖啤好疏爽咁用五萬蚊，買咗政治漫畫家馬龍嘅畫，佢唔單只覺得呢個價超值，仲話要向馬龍表示「敬意」。
尖啤喺台上面滔滔不絕，大讚長毛「有情有義」，反觀佢當年嘅「同志」就「有黨性，冇人性」，事關長毛喺佢入獄期間探咗佢三次，捐五萬蚊係「聊表謝意」。
出獄後嘅佢，言論真係愈嚟愈大膽，佢仲向《壹》仔大鬧基本法委員會主任李飛早幾日嚟香港講《基本法》「語出驚人」，逐一駁斥李飛講嘅嘢，話佢嘅訓示「令人莫名其妙！」
傳三大惹火人獲「祝福」做港區人大
港區人大代表選舉下個月舉行，最近江湖流傳一份「推薦名單」，聲稱名單上嘅人有望得到北京祝福而當選，唔少近期「惹火」人物，都榜上有名。
上榜嘅包括律師會前會長林新強，佢三年前高調為《一國兩制白皮書》護航，話白皮書「要求法官需要愛國」嘅部分冇問題，因為愛國係公民責任，又讚共產黨「好偉大」，結果律師會舉行特別會員大會，高票通過罷免佢。另一位上榜嘅法律界人物係陳曼琪，佢嘅成名作，當然係雨傘運動後期，代表旺角潮聯小巴申請禁制令，反佔中有功。
至於最近為國歌法護航嘅前港姐鄺美雲，亦喺名單上，佢話身為中國人，就要唱國歌，要感恩自己係中國人。其實早喺一五年政改表決前夕，佢就曾經現身「保普選、反暴力」街站簽名撐政改。舊年政府突然宣布，喺西九文化區起故宮文化博物館，鄺美雲都撐。喺香港，同樣係演藝界出身嘅人大代表，就有做過四屆政協委員嘅汪阿姐。
劉銳紹：當選人屁股決定腦袋
究竟呢類惹火人物上位嘅背後，解讀到咩呢？資深時事評論員劉銳紹認為，外界唔需要太關注邊啲人當選，因為即使有形象較中間嘅人成為港區人大代表，最後都係「屁股決定腦袋」，稍為唔聽話、有獨立思考都會受壓，要修正自己嘅行為。例如○八年北京奧運開幕前，有香港記者被搶相機，某人大代表曾經爭取攞番，但有關方面通知佢唔好再過問，結果不了了之。
浸大新聞系高級講師呂秉權就覺得，人大系統換上更有戰鬥力嘅人，相信係習近平要喺中共百周年黨慶前，鎮住香港局面，包括準備完成廿三條立法。佢又舉例指陳曼琪活躍於反佔中，喺北京眼中係識法律，有一定嘅包裝、溝通能力同戰鬥力，係幾合用嘅人才。
至於呢張「祝福名單」有幾可信？夫子話過去幾屆選舉前，選委之間都流傳「祝福」名單，最後除咗一、兩名人選有唔同，結果同名單大致一樣。呂秉權就相信，名單係各路消息拼湊而成，相信官方希望有名單喺手，控制唔同界別代表嘅比例。
依家民主派有二百二十五名人大選委，佔總數十分一，有民主派選委話要追擊林新強、陳曼琪呢類惹火人物，搞亂西環配票。但夫子覺得官方有差池機會率好低，因為傳聞有關方面為防範對家偷襲，連隱形民主派都要力阻當選，鬥爭思維好強。
撰文:巫不言
|
鍾意就快D Share啦！
|
|
|