君子之爭:去年失落立法會議席後，范國威指遇上的最大困難，是難以扣連地區問題和全港性政策，再帶上立法會討論，令地區議題被忽視。
新聞追擊
初選戰隔空駁火新東一打二
范國威出了名，「好熟書」。
電台節目上，他能即時糾正兩位對手提供的資料，有聽眾 phone-in說起梁天琦去年二月新東補選取得六萬票，范即打斷說「六萬六千」；他自己在立法會四年間以及十八年區議員工作政績，簡直倒背如流。
更好的候選人
「今次民主派初選係君子之爭，係喺適合同更加適合、好同更加好嘅候選人之間揀選，佢哋兩個都有自己嘅優勢，我只係強調自己嘅經驗。」范國威在多個場合強調，自己最有能力「應對嚟緊建制派有立法會經驗嘅鄧家彪。」
政綱走「務實本土」路線，他爭取「港人港水」，於本港興建海水化淡廠、反對普教中和雙非孕婦來港產子等。
補選議席原屬青年新政梁頌恆，有指在政治倫理下，議席應讓路予本土派。范國威認為討論初選時，已吸納本土派意見，本土派自有其決定。對他而言，更需順從的政治倫理是「向民主派支持者負責，唔能夠讓議席被建制派搶去。」
多次跟主張勇武抗爭的本土派割席，他仍有信心獲部分本土派選票支持，「即使我哋抗爭路線唔同，（但）我哋強調務實本土嘅倡議，係回應到唔少本土派支持者關注嘅議題。」
無時間糾纏過去
范國威曾直斥鄭家富在去年立法會選舉票，「從政嘅人晚節不保，臨老過唔到世。」是次訪問他隻字不提鄭家富，強調敗選後自己承擔最大責任，落選原因自有公論，沒時間糾纏過去發生的事。
去年立法會選舉投票當日，新同盟三名黨員突然替鄭家富站台，及後道歉退黨（范強調是執委將三人革出黨），然後繼續有區議員退黨，加上與民主黨的「牙齒印」，令人質疑他能否團結民主派。
「我諗市民關注嘅唔係政黨之間嘅恩怨情仇，或者黨內部嘅矛盾，佢哋更關注參政者同政黨做嘅工作，對民生議題嘅重視、政治議題嘅判斷。」
立法會 DQ補選明年三月舉行，參與泛民初選人馬塵埃落定，新界東由新民主同盟前立法會議員范國威、工黨主席郭永健和前學聯常委張秀賢，三人爭取代表泛民出選。
范國威因名氣較響亮，選情被看高一線，在選舉論壇上成為被針對目標。
他強調初選屬「君子之爭，喺適合同更適合嘅人之間揀選」，又強調「綜合實力」較高，最有能力跟建制派鄧家彪一拼。
而獲民主黨支持及眾志伸出援手的郭永健，雖較低調內斂，但亦加強火力，直指范國威一心想着「個議席屬於佢」，卻未如他般好好審視政治形勢；又稱要釐清「本土」定義。
至於張秀賢形容選情「勢均力敵」，雖然昔日學民戰友作班底的眾志，選擇支持郭永健，但他不認為自己是孤軍作戰，因與郭有共同敵人。
初選形勢複雜難測，選戰如箭在弦，三人受訪時隔空駁火，火藥味濃。
大台、網台、唔好被人抬
「講笑就係話，嚟緊嘅民主運動要搞咩呢，大台、網台、唔好被人抬。」他說大台是指各個政黨、運動和協調機制，如民主動力的協調機制和戴耀廷提出的風雲計劃，民主派也需着力推動，不可被北京政府「逐個擊破」；網台則是搞好自身政治論述，有輿論基地可政治動員群眾。
「唔好被人抬係咩呢？議會抗爭喺未來嘅日子，空間可能愈收愈窄，但唔代表唔搞抗爭。要抗爭，民主派就要有隊形，後面要有啲大大隻隻嘅阻住被保安抬，拖延時間，前線都需要有好似陳志全、長毛等衝去主席台，咁樣有策略嘅抗爭模式。」
建制派當道，民主派「被剝牙」，社會陷入政治運動低潮，若他當選立法會議員，恐怕這兩年任期，比前四年更難過。
「從政對我嚟講係一份職志，係一個長期嘅投入，我唔會好似其他參政者咁，講話只係參選做兩年、做四年（張秀賢指若當選，兩年任期滿後不尋求連任）。」他又引用德國社會學家馬克思韋伯的演講指：「政治係一個持續、有韌力，用鐵、用鑽鑽穿牆嘅工作，唔係一時三刻好激情嘅投入。」
一早參與本土戰
我橫又橫過你，高又高過你。」在初選論壇上，郭永健回敬范國威挑機這一句，充滿火藥味。黨內前輩張超雄形容他較內斂低調，不太願突出自己，對從政者而言好蝕底。決定參選後，他開始加強火力。
上月剛以三十一歲之齡，當選工黨最年輕主席，郭強調今次補選不只是議席替補，參選因現時政治形勢惡劣，「成場選舉不單係一場選舉，而係一場政治運動……大家用選票話俾當權者知，對近來連串打壓係不滿。」
心知范國威知名度較高，他都無有怕，「我覺得佢心態係覺得個議席屬於佢，啲人唔應該同佢爭。」他認為民主派正面對史無前例的挑戰，「係咪仲講呢啲務實本土呀，咩地區工作呀，佢（范）噚日講啲嘢，同二○一六年講嘅係冇分別個喎。
擴闊工人定義
出身基層的郭永健在馬鞍山恆安邨長大，被稱作「細孖」，因他有一名孖生兄長郭永禧，兄弟會考均獲二十八分、一同考入港大建築系、連住宿舍也在同一層。
兩兄弟的人生上半場幾乎相同，惟兄長現已成為建築師，建築作品包括紅十字會輸血中心總部；弟弟則為基層工人爭取權益，希望構建出一個公平的打工環境。
要推動工運，郭永健視之為畢生事業，「凡有資本主義嘅地方，打工仔女嘅待遇一定備受壓迫……比如便利店超市（職員）冇櫈坐，碼頭罷工，大家都會支持，呢個係最起碼嘅人性，覺得要幫受欺壓嘅人。」他認為工人定義不只出汗的一群，還包括服務性行業或要「食腦」的各行各業人士。
「我唔會話九七前咩都好」
取本土派選票，郭強調會釐清何謂「本土」，「如果講緊香港人嘅主體性、香港一啲文化、香港人應有嘅權利，工黨同我一路都做緊。」
他指無論房屋或社會福利問題，港英政府七十年代已預視到，但「佢見自己得嗰廿幾三十年貨仔，唔會係好完整嘅規劃，全部都係小修小補，頭痛醫頭。如果香港人要安身立命諗未來一百年嘅社會時，唔可以再跟以前嗰套。」
「我唔會好似有啲人話九七前咩都好……因為當時貧富懸殊好大，樓價又好高，正正係特區政府延續以往政策，導致今日後果；呢一種本土，佢哋（現今本土派）可能聽唔入耳，但問題係，你講嘅嘢其實我好早就開始做緊，當其他香港人唔在乎咩皇后呀天星時，我哋已經開始做緊。」
呃 like有底線
有傳媒以不耀眼形容郭永健，他亦稱：「我唔係咁鍾意討好大眾，比如我寫篇文章或者講嘢，識欣賞嘅人就知講得啱或者寫得好，一般人點睇，其實我一向諗法係唔 care。」他認為得到「身邊叫做叻、比較好嘅朋友」認同，比呃到一千個 like重要。但明白遊戲規則，所以在政治路上，他會盡量呃 like之餘不放棄底線，不講無邏輯或無事實根據的說話。
無論從政及人生大小事，郭妻均一直支持他，「今次初選都係，好多人會話對住個知名度咁高嘅人，短時間內點贏到佢，但佢都支持我迎難而上。」
誰支持誰
曾盛傳得到本土民主前線和青年新政支持出選的張秀賢，最初對此保持低調，後來強調得到黃台仰和梁頌恆支持，不過他日前在論壇改口，指對方立場是「不反對」。追問他這一點，他堅持是有團體破壞不以初選決定出戰者的共識。
「九月佢哋確實講過支持，去到依家『唔反對』，係因為有個初選喺度……我理解依家佢哋唔反對嘅人，都係唔反對為抗爭者做事嘅人，你唔可以話佢哋立場轉變咗……你問番佢哋呢件事有冇發生過，佢哋冇得否認。如果否認，咁有人就講大話囉。
共同對手
既然協調變初選，影響本土派點將，他又如何爭取本土派選民認同？張秀賢覺得，應先問民主派主流支持者，是否支持他出選，「本土派朋友未必認同初選機制，但初選機制出嚟嘅候選人，如果同本土派某啲理念比較一致嘅，你覺得本土派會唔會出嚟投呢一票？」
張秀賢形容選情「勢均力敵」，但昔日學民戰友作班底的眾志，卻支持郭永健，而不是他這位前「軍師」。話雖如此，張秀賢不認為自己是孤軍作戰，「郭永健一定唔係孤家寡人，因為我同佢一齊作戰緊。睇論壇表現，大家都知我同郭永健都有一個共同對手。」
《議事規則》修訂後，議會空間縮窄，他主張追求社區建設，建立長遠民間力量。這點跟范國威提倡「社區維權」，是否有點相似？他帶點激動說：「佢咁多年做過啲乜啫？佢做咗十八年區議員啦，如果佢要講社區維權真係有咁多作用嘅，佢十八年之內應該要做到啲成績㗎嘛。」
和頭酒
今次補選，民主派都打出「反威權」、「反 DQ」口號，不過要做到這點，張秀賢認為要有承諾，如自己提出只做一屆議員、支援區議會選戰等。
雖然議會抗爭空間收窄，不過爭取進入議會的他不認同無事可做，如議員仍可向政府索取資料、在各事務委員會工作等，議員身份亦有利為部分議題發聲。「《議事規則》改咗，冇咗拉布空間，但唔代表你冇議事空間、冇參政空間。」
如果真的輸了，他強調：「梗係全力幫其他人助選啦。」他以中大迎新營「互片」傳統後有「和頭片」為例，指民主派初選過後，還是要擺和頭酒。但他補充，之後的事之後再算：「反正我都有信心贏。」哪裡來的自信？他道：「廿幾日好多變化嘅，朱凱廸跑得出都係最尾一兩個星期發力。」
撰文:鄭語霆,劉卓瑩,李啟發
攝影:胡志堅,林金展
|
鍾意就快D Share啦！
|
|
|
