現年31歲的無綫藝人賴慰玲（Winki）即將生B榮升媽咪，預產期在本月初的她目前已全面停工待產，安在家中享受家人及好姊妹的「女王式」伺候。不過，Winki坦言一有時間便會陷入幻想當中，身為新手媽咪的她經常想像生產後的種種問題，坦言自懷孕開始已有此困擾，因而變得神經質！她日前在女性攝影師好友操刀下拍攝大肚寫真，以靚相為十月孕期寫下尾聲，笑言對好友信心十足，在對方指示下剝完一件又一件，最後僅剩下黑色喱士內衣，凸顯整個腹部的曲線美！雖然自爆有更大膽的相片，但她只留給自己欣賞。
懷孕後改變好大
講到身形與精神狀態Keep得好，但回憶十個月孕期的Winki坦言懷孕後改變好大，首先是變得易喊：「十月懷胎真係好唔容易，由知道有咗到聽到佢心跳聲嗰吓，係好漫長嘅等待！當我產檢真係聽到心跳聲時真係好感動，之後好期待每一次同BB見面，頭五、六次產檢見到BB都會喊，因為覺得好神奇，有一個生命喺自己身體中孕育緊，聽醫生講解佢啲手仔、手指我又會喊，只係一眨眼，冇見兩個星期佢又會多咗啲身體部分。」BB還在Winki生日時首次向她「打招呼」，成為孕期中最難忘：「第一次胎動喺我生日出現，佢郁咗一下時我都仲懷疑緊，然後再等多陣真係郁喎！後來仲郁到個肚三尖八角咁，好搞笑！」
雖然帶給種種感動，但新手媽媽Winki卻因缺乏經驗而變得神經質，懷胎到九個月時進入高峰：「因為一直好想順產，但係冇得預計，加上好多朋友都早產咗一個月，所以喺九個月嗰陣，我已經帶住走佬袋周圍走，去邊都帶住！搞到好緊張！自己有好多時間同空間幻想，又會諗係咪可以餵人奶、照顧得BB好好、會唔會變得好情緒化，真係好多種種幻想。」
不過，Winki在兩周前接下養胎前最後一個工作，期間感受到滿滿的關愛：「前排接咗個孕婦工作，傾合作時大家都好緊張會唔會拍拍吓隨時生，搞到開會嘅焦點去咗我身上！如果拍拍吓穿羊水、陣痛，咁我哋應對方法係點呢？拍攝嗰日，在場所有人都有種嚴陣以待、步步驚心嘅感覺，佢哋成日問我攰唔攰、頂唔頂得順。拍完喇，大家都高呼可以食西瓜，終於可以安心待產。」
感激身邊人關愛
面對身邊人的緊張，Winki坦言有時會令自己都緊張埋一份，但亦因關懷而放下種種壓力：「好感激身邊所有人嘅支持，我班好姊妹、屋企人都會問候我，問我最近心情點、叫我放鬆啲，感覺到好多愛，我亦都提醒自己，會有好多人幫我，就算湊得好攰，只要肯開聲的話，班姊妹同屋企人一定會嚟幫手，話可以做我保姆嚟照顧我。我慢慢提醒要放鬆心情，唔好有壓力，因為咁樣都對BB唔好。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|