陸永噚日做無綫頒獎禮主持，有網民覺得佢不在狀態，另有網民傳陸永喺台上誤寸完「荷蘭叻」之後，被高層訓話，事緣陸永搵朱千雪chitchat時，講咗個劇名係《誇過界》，連陸永都忍唔住自嘲：「《踩過界》好犀利，誇過……真係離晒譜。」Do姐即更正：「兩個劇集撈埋一齊嚟講都得嘅。」全場大笑，陸永有啲尷尬再笑住講：「係囉!我咁樣撈埋都得，浩信呼聲好高，你會唔會攞埋配埋一對?」
之後頒最佳男配角時，DO姐笑陸永連劇名都講錯，真係信唔過，陸永反駁：「我有咩唔敢呀!」Do姐繼續大笑，點知叫頒獎嘉賓讀到鮑姐嗰陣，陸永又「食螺絲」，Do姐見拍檔好似不在狀況，拎起支咪扮仆向陸永，暗示佢抵打。
不過成晚最出事，就係頒最佳非戲劇組節目嗰陣，Do姐派農夫助陣，C君行埋去話今次傾偈，唔好打呀，陳百祥笑住話：「你哋兩隻嘢唔使咁樣，好似好驚咁，我本身個人比較謙虛同和藹，唔係好似Do姐咁嘅。」點知陸永忽然手指一指陳百祥，講咗一句：「你喺謙虛方面都好囂張。」
雖然現場啲人大笑同傳出掌聲，但氣氛開始怪怪哋，陳百祥反駁：「囂張得過你，將人哋個節目改名，吓!我哋誇世代咁講。」陸永想兜一兜：「唔係!錯咗少少，唔緊要。」陳百祥當時都話：「呢啲唔係叫錯，呢啲叫玩吓。」(當時都唔似出事)……陸永、C君同Do姐拎跟手拎最佳節目主持，陸永仲笑晒攬好友黃翠如，講吓得獎感言，希望拍再三shopping，睇番陸永表情都冇嘢。
直至…中段講就嚟頒大獎，C君同Do姐依然笑笑口，陸永就冇咩表情，企喺側邊冇出聲，係咁點頭，陸永好細細聲講咗「留言」兩隻字，Do姐望一望陸永：「你做咩咁擔心。」陸永有啲無奈咁話：「我唔敢講，講錯劇集名幾次，我都係唔好講嘢好啲。」其後陸永都算回復狀態，講少咗嘢，更收起笑容，頒視后時，C君同陸永都忽然唔見咗，最後再出嚟，陸永就冇晒表情，好嚴肅咁講《踩過界》喺大陸嘅點擊率好高，之後就冇再講嘢，一直都係C君同Do姐講嘢。
凌晨有網民喺討論區爆陸永出事嘅導火線係因為喺台上寸完陳百祥，盛傳之後陸永喺後台俾人篤住個頭大聲鬧，更傳出高層要陸永即刻落場，呢位網民聲稱當時Do姐有勸導叫完騷先處理，另有網民稱中途有一位高層離席，疑去咗後台拆局，真唔真就陸永先知。
不過睇番IG噚晚C君有開心貼出同好友王浩信嘅selfie講吓自己做主持，之但係陸永成晚都冇更新IG，未知係「真係被高層照肺」定係太攰先冇post相呢!?
陸永今日回應傳媒指完騷後唔覺得叻哥有咩異樣，希望還叻哥一個清白：「叻哥係絕對冇可能咁小氣，會嬲呢件事，呢個大家諗多咗，誤會咗，要俾番叻哥一個清白，甚至有人話留言話叻哥指住我個頭嚟鬧，係絕對冇呢件事，完全冇可能，完咗大家都有傾講，本來大家度咗一段嘢，大家可以講吓，最尾因為得獎者先係重點，所以原先叻哥諗咗同我哋夾嗰段嘢，佢自己都冇講，佢都好快頒獎，直情係幫手，俾多啲時間得獎者講嘢。」
|
鍾意就快D Share啦！
|
|
|