無綫小花陳華鑫（Gloria）早前與圈外男友周國榮入紙申請結婚，今日喺泰國布吉低調舉行浪漫婚宴，兩人正式結為夫妻，恭喜晒！
Gloria曾經參選2012年嘅香港小姐，亦就讀過無綫藝員訓練班，其導師兼藝人鄭丹瑞亦專程飛抵當地去祝賀一對新人，之後仲喺社交網分享花絮照添！相中所見，場地布置以白色簡潔為主，一對新人晏晝嘅時候先喺布滿花瓣嘅花路上行禮，到晚上嘅時候，Gloria就換上一襲粉紅色晚裝，十分明艷照人。佢仲同老公喺煙花下甜蜜擁吻，唔少賓客都攞手機影低溫馨一幕，真係So Sweet！
鄭丹瑞留言話：「第26期藝訓班嫁女，恭喜Gloria！即便遠在布吉擺酒，也要第一時間飛去恭賀。在回程的飛機上，忽然想起：我總共教了四屆，有接近100個學生，他／她們都會結婚，成家立室，單單在送禮金這件小事上，憑我那份微薄的藝訓班校長薪水，豈不是嘔凸？！沒有向電視台申請加人工，真失策！」
聽老公唱歌眼濕濕
榮升人妻嘅Gloria接受東網訪問時表示婚禮喺20號舉行，並邀請了親友以及部分圈中好友出席：「出席嘅圈中人有鄭丹瑞及同期訓練班嘅同學，包括李旻芳、譚永浩等，大約有90人。（點解喺泰國搞？）因為我好鍾意泰國，所以揀咗喺呢度舉行婚禮，當日嘅程序都係接新娘、行禮同食晚飯。」
問到婚禮上最感動嘅一刻？Gloria透露：「最感動係接新娘時老公唱咗《喜歡你》，我聽到眼濕濕。因爲佢平時唔係好鍾意唱歌，所以我想佢今次唱歌，仲同一班姊妹度好遊戲，叫佢估一首關於Beyond嘅歌，結果佢一估就估到係《喜歡你》仲唱埋出嚟！另外一個感動位係行禮嗰一刻，環境布置得好靚好浪漫，我一見到佢同家人就感覺好澎湃，但冇真係喊，只係眼淚好想湧出嚟。鄭丹瑞同我伴娘嘅台上講辭都好感人，我都有喺台上特別多謝媽咪，話我好鍾意飲佢煲嘅湯，媽咪開心到笑晒。」佢又指暫時未計劃度蜜月，婚後將會繼續工作，唔會退出幕前，而造人方面則順其自然。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|