女星劉嘉玲近年頻頻參與大陸綜藝節目，最近佢就亮相《吐槽大會》第二季，不過就發生咗強吻事件，令佢嚇到花容失色！
自認克制唔到
節目每集都會邀請一位話題人物，要佢哋接受吐槽（意思大概係以開玩笑方式講人唔好嘅嘢）同自嘲，而劉嘉玲就係今集主角，有「咆哮教主」之稱嘅台灣男星馬景濤就係嘉賓之一！兩人曾喺1997年合拍電視劇《儂本多情》，但嘉玲就表示已經有廿年冇見，不過當馬景濤見到對方時非常熱情，走上前唔只擁抱，仲抱起對方原地轉咗兩個圈，已經嚇到嘉玲尖叫同掩耳！馬景濤就話：「節目組要我克制克制再克制，我克制不了！」不過嘉玲都驚魂未定，成個人僵硬咗打算整理吓件衫時，馬景濤又突然強吻對方，無計可施嘅嘉玲惟有不斷尖叫，唔識反應只可以掩臉，馬景濤最後聲嘶力竭咁話：「她是我心中永遠的女神，劉嘉玲！」終於可以返埋位坐嘅嘉玲就話：「嚇死我喇！」
曾飛擒大咬周海媚
而嘉賓都顯得非常尷尬，主持人又勸佢：「你稍微平靜一下！」網民睇完都話覺得場面好尷，又問「是不是喝酒了」？其實馬景濤唔係第一次咁「熱情」，2012年時重遇曾合作拍攝《倚天屠龍記》嘅周海媚時（海味），又啟動興奮Mode，向海味飛擒大咬，情境同今次真係有幾分相似……
馬景濤發文道歉
而馬景濤就喺微博回應事件，坦言喺節目上忘記吐槽先係正題，結果被劇組用咗佢嘅「咆哮」做重點！佢表示：「只希望努力的爭取圓滿，但卻不小心過了火，也自知不如意，請求節目組的補錄機會。半夜三點結束，同仁們也跟著（着）辛苦！雖然還是保留了現場的尷尬相信是覺得現場的效果更符合節目本身……觀眾的-100分和-10000分，我都接受，因為那確實是我。」
馬景濤感謝大家對佢同節目嘅關注，又向大家道歉，並承認：「我不適合脫口秀，給大家帶來的抱歉，也未必能抹去已有的看法。大家對我的所有批評，我都接受，失敗就是失敗了，也願意如此擔當首次脫口秀不良結果。不論是喜歡我的，討厭我的，因此離開我的粉絲，我都為此真誠的向大家道個歉！」
對於有網民懷疑佢飲咗酒，他則否認：「看到有人說我喝多了，這個鍋我不背，當天節目組曾精心為我安排晚飯，我一口沒吃。不是不好吃，是怕吃飽犯困，因為感冒，一直在咳，提前一天特別讓節目組給我準備了一些蘇打水，工作期間我是個連飯都不吃的人，又何來的酒？……第一次要講脫口秀，手心一直在出汗，我承認確實太過於緊張了，因為真的不會看大家表演的都那麼好，更加的緊張。緊張的結果，就是真正把#吐槽大會#變成了吐槽我的節目。」
馬景濤最後幽默表示：「有為我瘋狂打110（報警）的觀眾，我們還是不要麻煩員警叔叔了祝大家週（周）一愉快！」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|