台慶頒獎禮宣佈「最佳劇集」前夕，加插一個「50周年光輝獎」嘅環節，得獎者係…全公司工作人員！嘩，大家都有份，係咪人人上台呢？又唔係喎，無綫搵咗由總工程師做到首席顧問嘅羅仲炳同殿堂級藝人汪明荃代表拎呢個獎。
汪阿姐代表致辭時話：「呢個獎好特別，係今年新加，證明公司重視人材。我係1971年加入TVB，喺47年嚟，見到接近1萬個藝員出現，有啲o依家係國際巨星，有啲仲喺演藝圈打拼，有啲係好可惜，已經離開咗我哋，不過亦都有好多新面孔接棒，為電視呢個行業繼續工作。」
TVB做咗大台咁多年，經歷過亞視消失又復活、中間又有奇妙電視同Viutv兩個電視台嘅出現，再加上唔少藝員都北上發展，留唔住啲好嘅演員，點都會影響質素，長此落去，觀眾都會離棄，唔再睇無綫，所以作為無綫鎮台之寶嘅汪阿姐，都有啲寄語俾番大台：「希望公司可以好好咁珍惜我哋每一位，雖然我哋個個都好搏，好捱得，不過，如果公司嘅人工可以加多啲，休息嘅時間可以加多啲啲，關心多啲啲，山頭文化少啲啲，一定可以發掘，同埋挽留到更多嘅人材。」
將大台嘅「山頭文化」放上枱面講，都咪話唔大膽呀，而佢身後嘅一班藝人，原本聽到阿姐呼籲加人工、休息時間多啲都好開心，會拍下手掌，當聽到阿姐講山頭文化，就僵咗唔係好識反應，係得家燕姐笑得好開心……咁TVB幾座「大山」有乜反應呢？冇！人！知！因為鏡頭冇捕捉到呢一刻…
溫馨提示番，助理總經理余詠珊、副總經理杜之克、助理總經理曾勵珍、助理總經理樂易玲喺台下係一齊坐嘅，佢哋聽到阿姐呢一番話，會唔會即刻開個會討論下呢？
精選娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|