基哥喺記招上，引用民主黨已故元老司徒華講過：「成功不必我在，功成其中有我。」佢宣布唔做 Plan B，但呢場風波係咪咁就平息到呢？
八卦陣
基哥唔做 Plan B泛民中人憂破壞機制
民協馮檢基喺泛民九西初選落敗後，星期一（二十二日）召開記者會，宣布唔會做民主派初選嘅 Plan B，假如姚松炎被 DQ入唔到閘，按機制應由初選排第三嘅民主黨袁海文補上，強調要維持程序公義，呢個係民主派嘅共識，毋須外界討論。
被揶揄係爭奪「政壇關愛座」嘅基哥表明，今次決定係「退一步海闊天空」，避免民主派分裂。但有民主派中人認為，事件顯出泛民陣營嘅嫌隙，可能造成一定嘅反效果。事關初選結果前後，都有指如果姚松炎入唔到閘，都唔應該由基哥出選，呢個建議令唔少人不滿，認為係唔尊重機制甚至民主，咁仲點自稱民主派？
該名民主派中人指出，依家反對基哥做 Plan B嘅人，又點會支持得票更低嘅袁海文。而政界亦有消息話，有資深民主派成員開過會探討，係咪由重量級民主派前議員擔任 Plan B，討論人選包括公民黨梁家傑、余若薇，工黨李卓人，甚至民主黨創黨主席李柱銘等。今次風波，可能會令投咗票嘅選民，對初選機制失去信心。
民主動力就話尊重基哥決定，會同簽署咗初選備忘錄嘅持份者開會商討。袁海文認為根據初選機制同備忘錄，基哥應該係 Plan B，對佢嘅決定感到意外。佢理解事件令人產生初選機制被破壞嘅觀感，或者被市民見到泛民陣營有嫌隙都唔出奇。佢唔願意見到初選機制被衝擊，會先同民主動力同民主黨開會，再作決定。
方國珊部署戰新東獲數千提名票
西貢區議員方國珊前年高票落敗立法會新東選舉後，話咗唔會再參選，但星期二（二十三日）「話唔嫁又嫁」，宣布會出選三月新東補選。其實《壹》仔上星期問過方國珊，佢當時仲話未決定係咪參選，可能遲啲會公布，但承認一早攞緊提名，仲話已經拎咗幾千個添。
《壹》仔問佢幾時開始攞提名，方國珊即刻笑住答：「其實我攞咗好耐喇，哈哈""有提名表我咪印，睇吓攞得個成績點囉，我攞咗幾千張，哈哈哈。」佢又話自己無份參加初選，「人哋泛民又唔受我玩，民主動力都冇預我哋。」對方有佢哋所講嘅民主，但「唔等於我唔民主吖嘛。」
方國珊強調，自己唔係保皇黨亦唔係咩「假泛民」，唔埋堆之餘，亦唔鍾意小圈子選舉，總之自己做自己嘢。例如最近正為被裁員嘅港鐵外判保安組織請願活動，「如果一早講出嚟（話參選），好多嘢都做唔到，我想遲少少，做咗啲民生嘢先。」
舊年年尾已經有傳，佢有意再戰嚟緊嘅新東補選，仲計劃發起眾籌，咁咪真係眾籌緊呢？佢就話：「眾籌有嘅，啲物資多囉，錢就唔多喇。」跟住就話唔好講選舉，選舉要計經費，地區工作都可以眾籌，好似之前就眾籌到一批番薯，已經派晒俾街坊享用喎，聽落有少少九唔搭八。不過佢最後都補充，以往參選得千幾個提名，依家好多街坊俾咗提名佢，「幾千個（提名），超過晒呀。」
前立法局議員發言稿中共護法當書賣
民權觀察成員沈偉男，最近喺書局發現咗本書，將回歸前嘅立法局議員，喺議會討論香港政制發展嘅發言記錄蒐集成書。但佢就指本書除咗頭幾頁導言，其餘幾百頁都係當年各議員嘅辯論稿，質疑乜原來議事記錄可以俾人咁樣出書賣法。
本書叫《香港立法機關關於政制發展的辯論》，一共三卷，舊年七至十月出版，每本賣一百六十八蚊。內容係由一九八五年至九七年間，港英立法局議員同官員嘅致辭稿同發言記錄，話方便讀者了解當時社會各界對香港政制發展嘅不同觀點以及理據。出版社係三聯書店（香港）有限公司，《壹》仔三年前揭發，中聯辦幕後持有「三中商」三間書店。
睇番本書兩名作者之一嘅強世功係法學博士，現任北京大學法學院教授，○四年至○八年間，就擔任過中聯辦調研人員。呢名中共護法，一四年亦有份撰寫《一國兩制白皮書》。沈偉男喺 Facebook話雖然書中指已獲立法會授權刊載，但佢仍然驚奇，點解可以咁樣出本書，「仲要唔知係咪用嚟賺錢？如果係咁係咪個個都可以咁做？」
立法會秘書處回覆話作者事前有提出申請，指出書目的係為研究香港政制發展嘅學生、學者同研究機構等人士提供參考，考慮到相關資料可以喺立法會網頁取得，上述用途亦同研究及教育直接有關，所以同意申請，而秘書處舊年一共收到四項同類申請。
張秀賢領軍智庫再出發
民主派初選告一段落，分別出戰新東同九西嘅范國威同姚松炎，上星期都已經先後報名參選。有參與新東初選嘅中大學生會前會長張秀賢雖然輸咗，但之後都有唔少嘢忙。
張秀賢上年六月成立倡議組織「立言香港」，不過上年八月搞過一次論壇，同埋去台灣參與交流活動之後，就未有舉辦其他活動。睇番立言 Facebook專頁，對上一次更新已經係上個月十四日，出 post宣傳一個創新科技同意念交流嘅活動。
張秀賢解釋，當時立言暫停搞活動，係避免令人覺得活動同初選有關，但仍然有向政府同立法會提交政策意見書，例如上年十月，立言就《 2017年聯合國（反恐怖主義措施）（修訂）條例草案》提交過意見書。
雖然多咗時間參與立言運作，不過依家張秀賢面對嘅一大難關，相信係佢同佔中三子等八人，被控「煽惑他人作出公眾妨擾」等罪一案，代表三子嘅資深大律師麥高義喺月初預審時，申請撤銷「煽惑他人煽惑公眾妨擾」一罪，法官將案件押後至下月十三日裁決，仲未大步𨂾過。
撰文:巫不言
|
鍾意就快D Share啦！
|
|
|
