情與義，值千金！
向氏家族第二代、永盛電影公司老闆向華勝係袁詠儀（靚靚）嘅契哥，當年靚靚曾拍永盛電影《國產凌凌漆》、《賭神3之少年賭神》，靚靚同向生好投緣，經常聽向生講故仔，得閒又約食飯傾偈，當正向生係大佬，知道向生有病返大陸醫，好想去探望，而向生入院前，都介紹廣告給靚靚接拍，有情有義。
身為江湖大佬嘅向生，雖然好多人都驚佢，但契妹靚靚就話：「係喇，好多人見到佢都好驚，唔知驚乜嘅，但係我就真係見到佢一啲都唔驚，我仲覺得佢好搞笑㖭。」靚靚即場示範向生細路女絕招：「我最記得佢㗎喇：『我表演啲嘢你睇呀！』我話：『好吖！咩嚟㗎？』」原來向生好鬼馬，揈手就話：「軟嘅」，握拳就話：「硬嘅」，靚靚：「我話係人都得㗎啦，但係佢就覺得呢樣嘢好好笑，我覺得呢個人咁搞笑嘅。」
靚靚覺得向生其實好易相處，可能自己未見過佢嚴肅一面：「我覺得佢係一個好好嘅前輩，佢真係俾好多機會新人㗎，亦都唔會話想喺我哋身上攞任何嘅嘢嘅，以前可能大家都覺得，娛樂圈你可能要同嗰個人做啲乜嘢呀，你先至可以有啲咩機會呀。」靚靚擰晒頭，否認向生有潛規則。
靚靚還從向生身上學懂買股票投資：「佢咩都會識啲，佢咩都會講，我覺得你喺一個人身上，唔係要得到一樣絕學，就係叫學到嘢，其實你喺佢身上，睇到佢生平嘅行為或者佢做嘢嘅態度，你就已經學緊佢啲好處，我覺得佢對人人都係咁嘅，佢亦都好老實咁樣話俾你知佢嘅諗法係點。」
袁詠儀（靚靚）可以同向華勝稱兄道妹，完全唔驚呢位江湖大佬，反而卻驚一個人，就係「哥哥」張國榮！靚靚最難忘哥哥生前對佢嘅訓話：「佢會真係鬧囉，你知嗰陣時又《金枝玉葉》又《金玉滿堂》，嗰陣時真係我連瞓覺嘅時間都冇，可能真係會有啲飄飄然，覺得自己好紅呀，你喺片場真係唔會有人夠膽喝你或者鬧你㗎嘛，但係哥哥嗰時唔係㗎，『喂袁詠儀！過嚟！做咩呀！依家好紅呀！』佢真係會咁樣去做囉，我見到個人會驚嘅，我諗哥哥係其中一個囉。」
喺呢行挑通眼眉嘅哥哥，曾點醒靚靚為人太直，容易得罪人，問靚靚有冇聽哥哥話？靚靚坦言：「有，不過無入到好深，可能嗰時細個，覺得係咁㗎啦，你哋個個都咁講，可能嗰時再聽深啲記住啲，可能會好啲囉，自己嗰個福份唔夠喇嗰陣時；我覺得好幸運可以同佢拍到好多部戲，亦都係我好黃金時候同佢拍，哥哥帶俾我所有嘅畫面都係快樂開心嘅。」
至於靚靚嘅偶像梅艷芳，兩人只合作一部《金枝玉葉》，靚靚表示：「其實梅姐我諗我係，相處時間最少嘅，但佢喺我心目中一定係最長嗰個人，因為佢係我偶像吖嘛，聽佢嘅歌呀，睇佢嘅戲呀，我覺得梅姐其實...我覺得佢好孤獨呀，我認識嘅梅姐，我覺得佢有好多...我唔知咁樣講啱唔啱，可能佢啲friend出嚟話唔啱，但我覺得佢內心其實係好自己一個，好孤單！」
雖然梅姐相識滿天下，但靚靚覺得可能只係食飯、玩、工作嘅朋友：「真正了解佢心入面嘅，可能得一、兩個朋友，我覺得遺憾就係，我無用一個好好嘅機會去做佢嘅真心朋友，因為嗰時阿姐都有約我食飯，但我都用一啲工作忙嘅理由去推佢，如果依家俾我重新揀，我一定會去食飯，可能會睇下點樣調個工作，就算你話係咪做到佢真心朋友都好，都覺得自己後悔係無去做呢一步！」
喺梅姐身上，靚靚睇到一個演員應該係點：「因為梅姐身體唔係真係咁好，我覺得佢內裏係一個好溫柔、好弱嘅女人，但每一次出嚟，就係一個女強人，特別站喺台度就成個女神，例如佢拍戲嘅時候，病到死死下個樣，佢一換咗戲服，就好似飲咗十打寶礦力，突然間好有力呀，我諗演員就係你去到鏡頭前面，你就要做你嘅本份。」
採訪：陳月媚
協力：倩宜
攝錄：馮峰、卓振輝、吉吉
攝影：林德雄
化妝：Kerry wong
髮型：Sam Pan＠Muse Hair
場地：好酒好蔡
【閃耀人生女人心(10)】靚靚帶隊重遊小學 自爆13歲初戀錫錫點到即止
http://bit.ly/2Fg97ad
【閃耀人生女人心(9)】爸爸嗜賭曾寄人籬下 袁詠儀感謝母親管教嚴
http://bit.ly/2EDOMul
【閃耀人生女人心(8)】警察宿舍出世成長 袁詠儀夾埋阿哥打鄰居女孩
http://bit.ly/2o7QDky
【閃耀人生女人心(7)】唔識語言藝術得罪人 靚靚被雪成就影后路
http://bit.ly/2F5KCw7
【閃耀人生女人心(6)】經歷選港姐勾心鬥角 靚靚一心攞亞軍：我係張曼玉
http://bit.ly/2EEyLaP
【閃耀人生女人心(5)】老婆坐月Chilam照蒲 靚靚產後抑鬱險離婚
http://bit.ly/2HdEqmD
【閃耀人生女人心(4)】坦認女追男 靚靚呻俾老公食住：張智霖係唔會錯㗎！
http://bit.ly/2H9XvWy
【閃耀人生女人心(3)】狂造人望追多個女 靚靚人工受孕：我卵子已老
http://bit.ly/2CfW45g
【閃耀人生女人心(2)】懷疑魔童自閉過度活躍 靚靚陪睇心理醫生原來係...
http://bit.ly/2EinZDx
【閃耀人生女人心(1)】靚靚管教太嚴愛操控 魔童：我想換個新媽咪
http://bit.ly/2EkPJY1
最港電影大獎投票網址
http://bit.ly/thekongestfilmawards
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|