無綫「咪神」張秀文趁新正頭特別帶各位東網讀者品嘗牛豬雜錦鍋、藥膳雞鍋及刺身拼盆，又親自炮製甜品椰汁糕，祝願大家全年豐衣足食、步步高陞、心想事成！秀文更帶埋九個月的柴犬「太郎」一齊影賀年相及開餐，太郎見到鏡頭時不停笑口噬噬，超級可愛！
嚴選對象
秀文表示去年最大轉變是飼養了太郎，升呢「媽媽」後生活更開心，她笑言新年願望是榮升「奶奶」甚至「嫲嫲」：「好多有養狗嘅朋友讚太郎可愛，都想太郎做爸爸，帶隻狗女嚟想佢哋交配，希望要佢哋嘅BB。（想幫太郎揀隻咩狗女做老婆？）首先唔想要啡色，因為太郎黑色，上網黑啡生出嚟係啡色頭黑色身，好似被整蠱，長期除唔到件黑色衫咁！」
一嘗為人母滋味
秀文直言做「媽媽」後責任感也大增，每日也想盡快返家：「仲會Check住狗仔啲便便，見佢有健康便便就好開心！」問秀文何時自己真的做媽媽？她笑言沒有想過：「我個人唔係太有計劃，可能一時衝動都唔出奇，可能我係全家最細，冇話好想孭起個家庭，依家更加知做媽咪唔易呀！」她笑言今年不用買桃花轉運，因太郎已是她最大的桃花，令她認識了不少狗友，跟鄰舍關係都更好。事業方面，去年秀文多了拍劇機會，她直言愈拍愈上癮，更參與了一套大製作網劇，跟多位好戲之人合作，希望新一年可演繹更多不同角色。
新一年節制飲食
為食的秀文直言每年新年都會狂食各式糕點，最近主持飲食節目更是超標狂食，結果搞到消化不良，因此新一年要更注意飲食健康及份量：「之前拍第一集食好多海鮮、炒米粉，跟住仲拍掃街，撞到個鄉里賣燒賣粉果，令我諗起嫲嫲嘅味道，於是又幫襯咗唔少，結果消化不良，第日嘔黃膽水，所以新一年飲食要節制，唔會再食太多喇！而且身材都要Keep住，每大一年都會易肥咗！都開始有壓力，要做番多啲運動。」
髮型：Euling＠IL COLPO Platinum
場地：壹壹漁一＠旺角帝盛酒店
|
鍾意就快D Share啦！
|
|
|