熱爆娛樂: 【閃耀人生女人心(7)】唔識語言藝術得罪人靚靚被雪成就影后路 _

2018年2月21日星期三

【閃耀人生女人心(7)】唔識語言藝術得罪人靚靚被雪成就影后路 __,閃耀人生女人心,袁詠儀,靚靚,

90年攞港姐冠軍、91年拍第一部劇《我愛玫瑰園》做女主角，紅得好快嘅袁詠儀（靚靚）當年只有20歲，年少輕狂目空一切，加上性格又直率，把口永遠快過個腦，緊接嘅後果就係得罪人多，試過嫌劇本唔合理，直接搵監製投訴，再向傳媒投訴，結果被無綫踢入「雪櫃」挫銳氣。

回望過去冇後悔，靚靚接受《蘋果》連載專訪直認：「其實嗰段時間我係好容易得罪人嘅，講嘢可能真係冇思考過，我唔係唔知天高地厚，我覺得有啲嘢真係要講㗎，怕我都要去做，你又唔講，佢又唔講，咁做唔到㗎喇喎，咁我咪去講囉，當然你話我問題喺邊度呢，我就係說話藝術修飾得唔好，我唔識呢樣嘢，我會直接就係：『喂！咁樣得唔得呀？可唔可以呀？』咁你咪就係第一個衝去前面、又冇禮貌、死咪死嗰個囉！」

當年橫衝直撞，係咪成日俾人鬧呢？靚靚坦言：「我直接雪藏啦，乜鬼嘢鬧啫。」咁有冇上公司搵高層解決？靚靚話：「我冇呀，其實TVB雪咗我咁耐，我根本就唔知自己得罪人，但對我嚟講其實都係好運，因為我就係太得閒，突然有個電影導演叫柯受良就話：『喂，可以搵下呢個叫袁詠儀嘅人。』咁我就出咗去拍電影。」

因為柯受良賞識，靚靚加入影圈拍處女電影《亞飛與亞基》，得到金像獎最佳新演員，事業開始一飛沖天，一年拍14部戲，94年憑《新不了情》及95年憑《金枝玉葉》兩奪金像影后。然而，攀上高山後，卻突然走向低谷，靚靚都覺得莫名其妙：「97、98年，突然間冇戲拍，突然間冇人搵你拍，就算搵你拍都係嗰啲7日呀10日呀，我又冇去了解喎，淨係覺得突然間，你拍開啲大製作㗎嘛，30幾組40組㗎嘛，突然間嚟搵你都係10組，我唔係話嗰啲唔好，只不過唔係自己想拍嘅嘢，咁再跟住慢慢發現，直頭連呢啲10組8組嘅都唔嚟搵你，唔知點解！」

當時靚靚冇好唔開心，只係覺得會唔會係突然間，呢個娛樂圈唔適合自己？靚靚皺眉話：「係咪我有啲乜嘢唔係好啱呢個圈呢？咁我又冇諗退休，我最多都係諗歇一歇啫，橫掂都冇乜嘢做，不如去學下普通話、演戲呀，咁都好呀係咪先，都要知道自己嘅不足，嗰時嘉禾就畀我去上海。」

喺上海留咗幾個月，靚靚返港拍完一兩部戲，之後就接咗台灣電視劇《花木蘭》：「公司（嘉禾）問我想拍乜呀？我梗係想拍女人戲喇，成日都好想拍好似張艾嘉呀蕭芳芳呀張曼玉呀呢啲女人戲，但係唔知點解就冇，你梗係希望唔同階段有唔同作品，想再追另一個叫做進步，咪去咗拍《花木蘭》囉。其實我覺得遇着一部《我愛你》，我都好鍾意嗰個劇本，但可能嗰時氣氛唔係好適當時機，因為佢哋話好灰呀，但其實真係一個好劇本，因為你寄予厚望，但出嚟個成績唔好，對我嚟講都係一個打擊。」

入行28年，靚靚已經變做前輩級，看盡新人輩出優劣參次，睇唔過眼有冇出聲呢？靚靚：「我覺得話係冇用，要做畀佢睇係點，我啱啱去咗橫店，實實切切出現咗，以前去到現場，導演叫我哋讀劇本排戲，但家好得意，係導演、副導演同攝影師行位，演員就喺出面傾偈。」

靚靚冇隨波逐流跟大陸模式，第一日開工即刻行動：「下晝食完飯，我行入去話：『排戲嘞。』開始第一、二日，同我搭檔演員跟到我模式，第三日同新人拍，大家排完之後，我問：『阿邊個呢？使唔使入嚟睇下自己個位？』咁嗰個女仔就話：『我在外面啊！為甚麼你們不找我呢？』咦點解佢好似冇問題呢？我覺得就係嗰班人寵壞咗佢，由下一場開始，我又係咁樣行入去，佢好快就跟咗我哋入去。」

樹大有枯枝，以前試過有演員唔背對白，對住鏡頭講：「1234567」之後再配音了事，靚靚爆料：「佢哋家係勁到呢，助手喺後面講一句：『今日食咗飯未呀？』個演員就喺前面：『今日食咗飯未呀？』不過我唔會話佢囉，我覺得惟有感染佢，你知我衰樣呢，唔笑樣就好鬼惡，啲人可能真係覺得我係一個好嚴肅嘅電影工作者。」

家有啲新一代演員，有人幫佢記對白、拍個大頭跟住搵替身拍，靚靚狠批：「根本就唔健康，但我諗係佢哋嘅造化嚟，佢個命運唔係幾好囉，我個命運好啲，因為我出嚟嘅時候，我撞到啲好專業嘅人，佢哋話畀我聽係點樣做嘢，我就跟咗佢地嗰套。」雖然靚靚對某啲演員嘅態度睇唔過眼，但就讚曾合作拍劇嘅上海演員郭京飛：「其實佢近排都紅㗎啦，但嗰時佢同我拍《龍門鏢局》，我覺得佢好知道自己要做乜嘢，真係好有心機去做，願意捱，好肯蝕底。」

記者：陳月媚、倩宜

攝錄：馮峰、卓振輝、吉吉

攝影：林德雄

化妝：Kerry wong

髮型：Sam Pan @Muse Hair

場地提供：好酒好蔡

【閃耀人生女人心(6)】經歷選港姐勾心鬥角靚靚一心攞亞軍：我係張曼玉

http://bit.ly/2EEyLaP

【閃耀人生女人心(5)】老婆坐月Chilam照蒲靚靚產後抑鬱險離婚

http://bit.ly/2HdEqmD

【閃耀人生女人心(4)】坦認女追男靚靚呻俾老公食住：張智霖係唔會錯㗎！

http://bit.ly/2H9XvWy

【閃耀人生女人心(3)】狂造人望追多個女靚靚人工受孕：我卵子已老

http://bit.ly/2CfW45g

【閃耀人生女人心(2)】懷疑魔童自閉過度活躍靚靚陪睇心理醫生原來係...

http://bit.ly/2EinZDx

【閃耀人生女人心(1)】靚靚管教太嚴愛操控魔童：我想換個新媽咪

http://bit.ly/2EkPJY1

最港電影大獎投票網址

http://bit.ly/thekongestfilmawards

精選娛聞，喺晒《娛果》

http://fb.com/appledailyent

	袁詠儀笑指當年於電視台得罪人後，並沒有受責罵，因為她已直接被雪。	袁詠儀指自己只是性格率直，是「行先死先」的人版。
當選港姐，靚靚首齣拍攝的電視劇《我愛玫瑰園》便擔正當女主角。	當年是柯受良將靚靚於「雪櫃」內拯救出來。	拍攝爾冬陞的《新不了情》，令靚靚首度奪得香港電影金像像影后。
靚靚坦言陳可辛是她演藝事業上的伯樂，因為對方令她嘗試到不同的角色。	電影《金枝玉葉》是靚靚其一齣很喜歡的電影作品。	於電影《金枝玉葉》內，林志穎這個角色令靚靚再嘗影后滋味。
電影《我愛你》是另一齣袁詠儀很喜愛的作品。