52歲的郭富城（城城）去年4月迎娶年輕23歲的國產女模方媛，同年9月榮升人父，老婆為他誕下女兒。城城喜獲各界祝賀之時，其24年前許下的承諾被公開，表示結婚會向全港市民派利是，最近被網民在網上無限loop，要求城城「找數」。城城昨日出席公開活動時，做個「找數真漢子」，表示會將利是捐予聯合國兒童基金會。
郭富城昨日大年初五穿上藍色唐裝衫、戴藍色太眼鏡，風騷現身尖沙嘴的賀年活動。早於24年前，當年只有29歲的城城，接受負責娛樂節目採訪的祝文君訪問，曾在鏡頭前表示：「希望有一日我將來結咗婚，我就派利是，個個都有份，我講過嘅，全港嘅市民都會收到我嘅利是。」事隔24年，但隨着城城結婚，最近被網民翻炒要求他「找數」。
小朋友越多越熱鬧
城城昨日接受傳媒訪問時，被問到會否成為「找數真漢子」？他即笑說：「我有睇，都20幾年前，嗰陣時我仲係小朋友，𠵱家我大個啦，我找數。不過我冇可能逐家逐戶咁派利是，所以我會集合埋全港市民嘅利是捐出去，希望分享呢個福氣，我心目中想捐去UNICEF（聯合國兒童基金會）。」
至於，平日少談家事的城城，未知是否受濃厚節日氣氛影響，心情特別好，在台上主動提及囡囡，他說：「一直都好想有自己寶寶，多咗個女又結咗婚，家庭生活十分開心。」城城又謂：「以往嘅新年假期其實都好短，今年就特登提早，享受吓家庭樂，做咗爸爸嘅心情到𠵱家都仲好興奮。」司儀問他的狗年願望？城城毫不避忌，興奮說：「追個仔」城城其後受訪時說：「今年特別開心，因為屋企熱鬧咗好多，有家庭、有小朋友，真係好熱鬧。𠵱家囡囡五個月大，一家人都好開心，同未結婚完全係兩個世界，𠵱家覺得生活同快樂真係好簡單。」
問到是否真的想追仔？城城坦言母親好鍾意：「佢有得抱孫女，但係都成日同我哋講，你睇吓你個女幾得意，快啲追番個仔。佢抱孫女都唔夠，咁我哋好孝順嘅，會盡量努力，不過都要順其自然，希望今年追番個仔」問到想生幾多個？城城表示如果老婆不怕辛苦，可以生多些，他說：「社會一仔一女都好足夠，不過我就覺得小朋友越多越熱鬧。」
下一步幫囡囡沖涼
說到囡囡，城城幾乎停不到嘴，甚至分享湊女生活，指自己有份餵囡囡食糊仔，還慈父上身說：「要好細心咁餵，下一步希望同佢沖涼，換片嗰啲我就喺側邊睇，因為我驚自己太大力。」他又爆老婆幫囡囡沖涼時，不小心讓囡囡飲水，嚇得他都不敢幫囡囡沖涼。城城又說：「湊佢真係難過跳舞好多，又要𠱁佢瞓覺，不過希望喺開工之前，可以帶佢去公園玩，呢個係我嘅目標。」
採訪：盧妹
攝影：葉君海
|
鍾意就快D Share啦！
|
|
|