掃呢頁CODE去手機

2018年2月21日 星期三

【爆相爆片】又一星二代曝光!劉錫明15歲囡囡文青look登場 __,劉錫明,

喺90年代被捧為無綫當紅小生嘅劉錫明,當年因為同周慧敏(Vivian)拍《烏金血劍》傳緋聞,事後劉錫明公開承認對Vivian有好感,Vivian嘅男友 ...




喺90年代被捧為無綫當紅小生嘅劉錫明,當年因為同周慧敏(Vivian)拍《烏金血劍》傳緋聞,事後劉錫明公開承認對Vivian有好感,Vivian嘅男友倪震激到嬲嬲豬,結果連續3年喺旗下雜誌《YES!》唱衰,仲要硬加「毒瘤明」之名喺劉錫明身上,最後令到佢嘅事業插水,名譽受損,喺94年毅然放棄香港巿場,轉攻台灣發展。

正所謂坎坷過後有艇搭,劉錫明喺台灣同大陸嘅演藝發展好好,仲娶咗個台灣老婆張齊玲,兩人仲生咗一個女,一家三口過住幸福嘅生活。而倪震喺09年同Vivian結婚嘅時候,亦首次向劉錫明表示歉意,直認當年年少氣盛,冇安全感下先傷害對方,劉錫明亦好大方話對事件早已釋懷冇怨。(新聞連結: http://bit.ly/2Hp3GXb)

之不過話晒離鄉別井生活咁多年,劉錫明當然好掛香港嘅屋企人,所以佢喺訪問曾經講過,喺農曆年會返香港陪媽咪,日前有《蘋果》讀者鄺小姐,就喺尖沙嘴嘅The ONE捕獲劉錫明,佢透過「爆相爆片」公開當時情況,當時劉錫明身邊有老婆同個女,鄺小姐話:「嗰日係下晝6點鐘左右,劉錫明同埋佢囡囡喺嗰啲商場佈置影相,佢真係好錫老婆同個女,跟住佢哋周圍轉揸機影相,仲踎低搵啲靚嘅角度,又幫老婆拎手袋。」

鄺小姐仲話:「可能劉錫明帶咗眼鏡,冇乜人認得佢,佢仲自備埋自拍器,搵埋角度就影全家福,大約影咗6、6分鐘走,之後見到佢好似仲有啲朋友一齊,不過影相只係得佢哋一家,其他人只係周圍睇吓啲佈置。」

事後劉錫明接受《蘋果》嘅訪問,講到讀者讚佢係好爸爸,全程對囡囡都好呵護,佢話:「係呀,真係上世小情人,新年專登同太太及囡囡返嚟香港,同屋企人食吓飯見吓面,仲同囡囡入長洲逛吓,帶佢睇吓啲傳統嘢囉,佢去到見到好多好新鮮嘅嘢,初四嗰日我哋就離開香港。」

睇到囡囡生得亭亭玉立,而且仲好標青,仲好有文青feel,佢就笑笑口話:「囡囡今年都15歲,佢食飯㗎嘛,佢算乖喇,老婆教得好,我老婆管佢好嚴!今次返嚟梗係逗咗好多利是,佢去邊都逗到!」跟住劉錫明順道同讀者拜年:「我喺度祝大家新一年越嚟越好,恭喜發財,萬事勝意。」

最港電影大獎投票網址

http://bit.ly/thekongestfilmawards

精選娛聞,喺晒《娛果》

http://fb.com/appledailyent

劉錫明專登帶老婆同囡囡返香港過年! 劉錫明一家三口喺年初一現身尖沙嘴(讀者提供圖片) 仲喺商場啲新年佈景前狂selfie(讀者提供圖片)
好溫馨喎!(讀者提供圖片) 幫老婆拎袋!(讀者提供圖片) (讀者提供圖片)
踎低影相又有乜所謂!(讀者提供圖片) 劉錫明話囡囡今年已經15歲! 囡囡生得好標青喎!
(資料圖片)

鍾意就快D Share啦!