任達華經過多次求婚，終於在泰國得到琦琦Say Yes，落實婚嫁日期——97年12月29日，在維也納和澳洲影婚紗相，靚人靚景。兩人本來計劃在歐洲低調結婚，但最終決定返香港，與好友親朋分享喜悅。
97年結婚，去年底剛好結婚20周年。琦琦說：「其實嫁個好老公，日日都係結婚紀念。十周年時，我哋好似去咗泰國玩，唔係好記得。今年（指2017年）一齊去芬蘭，同個女一齊去玩。」
每年結婚紀念，華哥都會送禮——送過樓，又送過舖：「20周年，佢有特別禮物送俾我，送diamond！佢好細心，今年分三個不同階段，送三粒唔同形狀嘅鑽石，送咗圓形、送咗方形，同一個心形。其實心形佢以前送過，但今次大粒啲，幾卡重，嘻嘻。」對琦琦而言，心意比樓舖更貴重。
看琦琦和任達華相處，身邊人總感受到兩人之間濃濃的愛情，「我哋依家一齊都超過20年，兩個人仲係好似啱啱識嘅感覺，呢樣嘢我好感恩，因為幸福唔係必然嘅。女人係一定要嫁俾愛情，一世要同一個人一齊喎！有冇錢唔係最緊要，婚姻係好緊要的，有相同價值觀，有共同話題可以分享。」
華哥拍電影。琦琦愛電影。有時老公無暇去睇片，她會代看，之後講俾老公聽；琦琦做珠寶，華哥會俾好多idea。
「我同華哥係一個相互成長嘅人生。我哋識嗰陣，大家事業都係一齊起步，大家一齊成長，一齊行一條路。大家付出、理解、包容，俾對方好大自由度，互相扶持，係好幸福好sweet。」
每天都講「我愛你」，講電話收線前必講「我愛你」，情人知己，有講不完的話題。但共同生活咁多年，真係冇嘈交？「真係好少，因為華哥係一個超級好脾氣嘅人，佢係冇脾氣嘅，佢朝早瞓醒都係笑住醒。我自己有時會急，佢唔會。」
壓力人人有，如何化壓力為動力，是兩人共同課題，「每人都有壓力，如果你唔識handle，你點會成功呢？我們兩個處理呢樣嘢都好好，就係將佢簡化。如果你已經好努力去做，但都fulfill唔到，咁你惟有再努力啲！」
採訪、撰文：林妙萍
攝影：周樂恒
攝錄：林德雄、葉君海
化妝：淑貞
場地：QQM、六公館（海港城）
精選娛聞，喺晒《娛果》
http://fb.com/appledailyent
【閃耀人生女人心－琦琦篇(1)】任達華淺水灣食麥記追琦琦
http://bit.ly/2HMJnmK
【閃耀人生女人心－琦琦篇(2)】華哥初會女神失晒魂 琦琦：佢好緊張
http://bit.ly/2GMIRUl
|
鍾意就快D Share啦！
|
|
|