10年贏咗無綫主辦嘅歌唱比賽節目《超級巨聲2》入行嘅林欣彤，第二年就簽咗英皇後冇耐突然失聲，仲患上抑鬱及厭食症 同苦難交戰，呢幾年，Mag嘅生活就好似來回地獄咁，今日，終於折返人間，戰勝抑鬱，經歷咗咁多，有咩得著？「我真係好深信所有苦難都係祝福嚟嘅，因為我經歷低潮嘅時間，反而覺得係生命中感受愛嘅最大機會，因為經歷低潮時嘅我都一定唔會可愛，但係佢哋依然愛我，依然留守喺我身邊，呢啲所有都係禮物，同埋我覺得一個人有軟弱，先有機會去磨練令自己變強，所以我身上所有嘅軟弱，其實都係上天俾我一個機會，『Mag你要強，首先要經歷軟弱，你唔係天生強，你嘅強係靠你自己力量得嚟』，所以所有難關我都覺得係時候要變得強啲。」
一出道已經好受歡迎，不過，好快就失聲、抑鬱兼厭食，有冇諗過係個天玩自己？她說：「我又唔會咁樣諗，反而我會覺得以自己智慧，未必洞悉到究竟上天安排，背後原因係點解？我覺得嗰啲苦難或者考驗，係個天故意嘅，佢俾我感受晒一刻得到好多嘢，同埋一刻無咗好多嘢嘅時候，人嘅狀態係點，所以覺得經歷咗呢啲時刻之後嘅我，更加知道自己想要啲乜嘢。」Mag有冇一刻諗過放棄呢？「曾經有㗎，好坦白講，我諗每一個人喺堅持嘅過程中，都可能有放棄嘅念頭，如果唔係就唔使堅持，堅持就因為你可能想放棄，但我又好慶幸有時好軟弱嘅時候，就係靠身邊愛我嘅人，佢哋撐住我，所以我覺得呢一刻有嘅所有成就，或者之後將會有嘅每一個收穫，唔係我一個人得嚟，係靠住身邊所有人俾我嘅力量，佢哋每一個人都有份。」Mag經歷過健康、事業的高山低谷後，更加硬淨，更加有香港精神！「其實我繼續好努力咁存在，或者繼續好努力咁堅持去追我嘅夢，就係想話俾大家知：我得，你都得！呢個係我作為公眾人物遇到苦難嘅使命，就係我要喺香港人面前經過佢，要戰勝佢，又或者要擁抱我嘅困難！」
撰文：海 山
攝影：黃志明
錄影：葉志明
髮型：Terry yeung @corner
服裝提供：Rococo
場地提供：草民café
來源 source: http://nextplus.nextmedia.com
|
鍾意就快D Share啦！
|
|
|