螢幕前嘅唐文龍好有性格，螢幕後嘅佢熱愛環保，原來佢仲係一位好好先生，日前中午12點左右，《蘋果》撞見唐文龍獨自一人離開大角嘴寓所，冇開車嘅佢火速跳上咗 ...
螢幕前嘅唐文龍好有性格，螢幕後嘅佢熱愛環保，原來佢仲係一位好好先生，日前中午12點左右，《蘋果》撞見唐文龍獨自一人離開大角嘴寓所，冇開車嘅佢火速跳上咗一部的士直出尖沙嘴喜來登酒店，到埗後入咗去逗留近3粒鐘先離開，跟住出嚟又跳上的士去咗旺角一間銀行處理私務，最後一站係附近便利店，佢應該幾留心娛樂新聞，見佢左睇右睇，最後買咗一本八卦雜誌，然後再搭的士返屋企。
唐文龍返到屋企樓下，重要畫面出現，當時係落緊雨，佢如常落的士，咁啱車旁有個擔住遮嘅女仔等緊佢部的士，雖然唐文龍自己冇帶遮，不過佢落車之後唔係第一時間飆去避雨，而係淋住雨都好有紳士風度咁拉住車門畀等女仔收遮上車，再細心為對方關上車門，對陌生女仔都咁細心，唐文龍此舉值得一讚。
其實唐文龍行善都唔係第一日嘅事，早前佢都有份去排隊捐血幫助巴士車禍傷者，平日又成日喺社交網貼出唔同地方嘅回收箱合照，用行動宣揚環保訊息，佢都絕對係一個好踏實又正面嘅藝人。
對於冒雨照顧女仔，唐文龍回覆《蘋果》時話：「我都唔知當日有狗仔隊影相，純粹因為大雨先幫佢，無論男仔女仔，我覺得應該咁做，就係因為唔係細雨先出手，香港好多人其實都有正能量，大城巿人人都好匆忙，如果我有遮，人哋冇遮，我都會畀人㗎。」
唐文龍續話：「唔使因為呢件事加我分，唔係儲fans，好平常，人與人應互相愛護，一次過緣份，呢世都唔會見到，更加難得呀。我哋會對男女朋友、兄弟姊妹同親人好係應該，但對唔認識嘅人，一刹那catch到，一生一次機會，更加要關懷。」唐文龍心地咁善良，相信呢個筍盤好受歡迎啦？講到呢樣嘢唐文龍就咁講：「我仲係單身。」
精選娛聞，喺晒《娛果》
http://fb.com/appledailyent
攝影：徐錦池、孔志豪
| 採訪、攝影：徐錦池、孔志豪 |  日前中午12點左右，《蘋果》撞見唐文龍獨自一人離開大角嘴寓所。 | 喺旺角處理完事務之後唐文龍就手執一本娛樂雜誌搭的士返屋企。 |
| 唐文龍返到屋企樓下，當時係落緊雨，佢如常落的士。 | 咁啱車旁有個擔住遮嘅女仔等緊佢部的士，佢淋住雨都好有紳士風度咁拉住車門。 | 等女仔收遮上車，佢再細心為對方關上車門。 |
