有線前主播劉家聰，今年初發現患腦瘤，要接受開腦手術，走過鬼門關，噚日開心過40歲生日。
劉家聰回想醫生要佢開腦，佢接受《蘋果》電話訪問時話：「發現有腦瘤，十日內安排手術，手術前，我同囡囡喺屋企睇《女醫神Doctor X 3》，咁啱嗰集講開腦，同真實未必一樣，但我會知咗個過程，之後又睇咗一個英國相關資訊節目。」從未做過手術嘅劉家聰笑言全靠呢兩個節目令佢打咗底：「入到手術室，原來枱機器真係咁大，醫生同我講手術大約10個小時先完成，結果7小時搞掂，好順利。」手術前，劉家聰好清楚呢個開腦手術係高風險，「醫生話如果去到要10個鐘，開完腦，冚番頭骨就『乜嘢』㗎啦，醫生同我講會盡力，但成唔成功靠個天，好彩喺7小時提早完成，成個手術我失去600cc血，醫生係咗要同我輸血，結果都唔使，我由手術室推去ICU，我好快醒番。」
劉家聰話睇過節目話神經線如斷咗修復，有機會腳趾手指郁唔到，但佢需要時間生番。呢個概念都入咗劉家聰腦，佢不斷提自己要有堅強意志力：「我要提自己要郁番，有人話手術後有機會講嘢會黐脷筋，我喺留院期間，我都好擔心，係咁讀稿同講嘢練口齒。畢竟個腦會控制身體器官，聽唔到就講唔到。我出院時都要坐輪椅，但新年後，我已經可以行番路。」
問到劉家聰會點形容呢次死過翻生嘅開腦大手術？佢話：「我『重生』，人好渺少，身體少少病都會影響好大，今日我可以好番，係個天畀我『重生』，令我可以重新認識自己，即使幾熱愛工作，工作都要放輕鬆，有時追新聞真係好忙。」劉家聰勸喻大家要愛惜身體，佢o依家仍然每周要覆診，暫時要吃半年藥，佢身體狀況一天比一天好，佢都開始重新投入社交生活。
劉家聰離職有線，佢其後轉投亞視，不過未返新工即遇上要接受腦瘤手術，佢大讚亞視有人情味：「我同佢哋簽部頭約，本來4月有工作，佢哋知我情況畀我順延。」劉家聰笑言呢次私院開腦手術費數十萬埋單：「成架E Class冇咗。」不過錢財身外物，佢慶幸做幕後太太一直用說話支持，囡囡也為爹哋打氣，有報道指佢患病時太太還擔起頭家，劉家聰話：「真係好感激太太同家人精神支持，病人係好需要說話安慰，至於經濟上，一家人無分你我，我一直都有好好理財觀念，健康比金錢重要。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|