相隔16年，歌手黎瑞恩將於4月5及6日再踏紅館舉行《黎瑞恩感恩有你演唱會2018》，小恩子接受東網專訪自爆2002年在紅館唱完騷後，曾經有人問她：「小恩你幾時會再喺紅館開演唱會？」她笑說：「當時我答：『當我離婚之日就係喺紅館再開演唱會之時。』點知畀我講中咗，真係邪惡呢件事，哈哈！（點解當時會咁講？）你冇理由冇啦啦走去開騷㗎嘛，我嗰時做完個騷就去結婚喇，結完婚一路冇嘢梗係唔會再唱歌㗎嘛，係咪先？當你再有機會唱歌，咪就係我離咗婚嘅時候囉！（你開口中！）真係好鬼烏鴉嘴。」今次唱完呢？她笑言不會有事，因為她已回復單身。
離婚未感挫折
小恩子與前夫曾智明於2014年離婚，但她不覺得是人生一大挫折，她說：「我成日覺得如果有啲嘢係唔啱，你監生要擺埋一齊，你會唔會覺得好痛苦先嗰件事？有啲嘢可能已經唔再屬於你，你夾硬再落去會唔會變番好？我真係好難諗，因為我自己個性格，有啲嘢唔得就唔得，你過咗我底線，永遠都唔得㗎喇，我係好堅持呢樣嘢。」
不排除再婚
小恩子坦言分開後可能大家都開心，但她直認當時確實好嬲前夫，她說：「肯定有啦，癲咗！（被另一半背叛接受唔到？）我想知有邊個可以接受到？當其時火遮眼，乜都唔得㗎，但依家覺得可能未必係佢一個造成呢件事，可能真係有啲嘢自己都做錯，都有朋友提醒我，話唔可以賴晒佢，話我都可能要負番啲責任。（咁你覺得自己責任喺邊？）個人太Man，可能有啲男人鍾意啲嬌嗲女人。（她隨即扮嬌嗲聲）『我真係好需要你！』但我真係唔係囉！」她坦言當時夜闌人靜，都會忍不住爆發喪喊。她可有想過再婚？她笑說：「嘩！冇諗喎，又唔係未結過，唔使（驚咗？）我冇驚喎，不過年紀大結婚都幾浪漫呀。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|