掃呢頁CODE去手機

2018年3月14日 星期三

【劉華一家返大馬】 十二兵團護駕 劉華朱麗倩合體湊女祭祖 __,朱麗倩,劉德華,劉華,

12年劉華同朱麗倩誕下寶貝女劉向蕙(Hanna),天王女出世後,劉華一直採取嚴管政策,嚴防女兒曝光。以往在公眾場所,劉華同朱麗倩從來唔會合體湊女,避免 ...


12年劉華同朱麗倩誕下寶貝女劉向蕙(Hanna),天王女出世後,劉華一直採取嚴管政策,嚴防女兒曝光。以往在公眾場所,劉華同朱麗倩從來唔會合體湊女,避免引起注目。不過隨着Hanna愈來愈大,劉華開始逐步放寬。最近終於破例喇!趁住農曆年假,一家三口舉家返大馬祭祖。今次劉華同朱麗倩終於唔使再分開走,落機時一家三口齊齊出閘。天王女出巡,保安功夫做到足。十日旅程,動用十二人團隊式護駕,認真大陣仗!

在大馬出世的朱麗倩,每年定時定候一定返娘家祭祖,去年劉華出事時,朱麗倩原本已帶埋Hanna出發返娘家。得知老公墮馬,朱麗倩漏夜撲去泰國。

「華仔出事嗰陣,朱麗倩真係日日陪住佢㗎,以前佢一年起碼返大馬三、四次,但華仔休養嗰八個月,佢同個女都冇離開過香港,所以華仔應承過佢,今年幾忙都好,一定陪佢返娘家補數,同埋Hanna九月升小一,到時大人小朋友都忙,冇咁多機會成家去長旅行。」

以往一家三口出埠,避免引起注目,劉華例牌同老婆分開上機。今次劉華豁出去喇!一家三口齊齊出發去吉隆坡,搵咗三個工人姐姐,兩個保鑣,加埋一個女助手貼身跟實,六對三,包冇甩漏!

在大馬逗留足足兩星期,一家三口坐夜機返港。撞啱假期,機場人來人往,劉華早有準備,一早安排兩架七人車,兩個司機加四個保鑣接機,加埋跟身團隊,一共十二人護駕,提高戒備!

航班未着陸,四名保鑣一早已stand by,在閘口附近巡邏。黑衫黑褲的劉華,戴住cap帽、口罩包到冚率先落機,尾隨的朱麗倩一樣戴住口罩,兩公婆急步向前行。至於Hanna就由工人姐姐負責抱住。眨吓眼五歲半的Hanna,冇見一排明顯又高咗一截,手長腳長,著住黑白色棒球褸襯黑色legging,加埋對黑金adidas波鞋,十分有型!Hanna仲留咗一頭長髮,五官同細個時一樣咁標致,依然係眼大大、鼻高高,仲愈大愈似媽咪。

一行人從禁區火速步出閘口,工人姐姐抱住Hanna一馬當先,朱麗倩尾隨,劉華殿後,三人keep住相隔幾個身位。Hanna都好醒目,一直伏在工人姐姐膊頭。行到去扶手電梯,劉華稍為放下戒心,Hanna終於落地自己一個行。難得有爸爸媽咪陪出埠,Hanna心情興奮,沿路一直跳吓跳吓,去到停車場,仲主動要拖住爸爸,安頓好老婆同阿女,劉華接住上車走人。兩星期旅程,一家三口連埋團隊,足足動用四架行李車,載住十七件行李,當中包括十個紙皮箱,收穫豐富。

相關新聞:

【墮馬後開竅】劉華逐步放寬 公開Hanna 真面目

http://bit.ly/2HvylB4

棄國際學校 李嘉欣黃浩然 心儀傳統名校

http://bit.ly/2IpoKNp

【天王女考小一】唔揀國際學校 劉華朱麗倩心儀女拔小

http://bit.ly/2HvJhyH




來源 source: http://s.nextmedia.com
鍾意就快D Share啦!