黃子華就話「原則上」呢個係最後一個騷。
藝人黃子華將會喺7月舉行棟篤笑，因為一個騷名《金盆𠺘口》引嚟網上極大回響，大家都好擔心子華神要封咪，結果佢琴日出活動嘅時候畀咗一個好傷心嘅答案大家，就係呢個棟篤笑真係佢嘅最後一個棟篤笑，完咗之後就會收咪！當時子華就叫大家唔使擔心，佢話自己唔係死咗，佢會繼續有其他新動向。
活動完咗之後，子華就喺社交網上拍片澄清番自己嘅講法，等知道呢個消息嘅人更加清楚明白。佢就話其實《金盆𠺘口》唔係一個騷名，而係佢嘅一個階段：「原本我哋打算宣布呢個係黃子華最後嘅棟篤笑，但我嘅團隊覺得咁樣太決斷，呢啲名太過凌厲會畀人鬧死，所以就用番我好多年前諗嘅一個名，係好多人認為嗰種『金盆𠺘口』。原則上呢個係我最後一個棟篤笑。」之後佢又澄清呢個騷係唔會有巡迴演出，因為成個主題係「101%」圍繞香港，如果去到其他地方都係講香港話題係太唔負責任。有唔少網民都話失望但都會繼續支持佢，亦有人留言話：「講得原則上，即係可能有例外喇！」咁又唔使擔心嘅，子華同大家講得相信佢已經諗好之後嘅路，大家就繼續撐佢喇！
來源 source: http://hk.on.cc
|
鍾意就快D Share啦！
|
|
|