黃秋生早前網上貼出英籍生父照尋根，一呼百應，網民紛紛幫忙，當秋生半個月前仍喺英國拍戲，已接到消息，秋生今日回覆《蘋果》話：「我貼咗爸爸相時，大約半個月喺英國有啲人專幫人搵family tree就搵我，話起晒資料，仲搵埋聯絡電話出嚟，我上機由英回港仲畀咗我。我個姪（大孖David)個仔聯絡我，佢話我兩個孖生哥哥上船玩，已將消息相告。兩位哥哥事後猛咁邀請我去澳洲見面，我仲十五、十六。」
大約兩周前，同父異母孖生哥哥、74歲嘅David同John決定坐機來港同秋生相認，秋生盡地主之誼帶佢哋去玩，三兄弟初見面並唔陌生，秋生坦言：「去接機時我都緊張，但見到有熟悉感覺。」問到秋生可有帶媽咪跟孖生哥哥會面？秋生話：「我媽咪平時係都唔郁得，但一見兩哥哥好大反應，佢想起身，結果媽咪見完哥哥仲高血壓，入埋院，但o依家冇事啦。」
秋生「尋」根成功，佢話自己有所改變：「我醒咗，一路以嚟包袱掉低咗，兩位哥哥講咗好多爸爸故事畀我知，令我變得孭起另一啲嘢，我變咗個新人咁，成個人好開心，冇晒以前嘅抑鬱，完全變另一個人。」
秋生跟兩兄團聚時，佢話哥哥有送佢一本相簿，佢有送上主演電影DVD，秋生話：「其中有哥哥話YouTube睇晒我作品，大孖David仲鍾意玩音樂，佢打鼓。」兩位哥哥已退休，佢哋見番秋生，竟然提佢要去拎番本英國護照：「哥哥仲同我問晒英國領事館，我知手續唔容易，佢哋話會幫手。」短短幾分鐘電話訪問，不難感受到秋生快樂感覺，開朗笑聲，佢仲話稍後有空，會過澳洲見其他親友。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
