40呎長真暴龍化石，全球曝光居然會在香港？
對！估計有6,500萬年歷史、名為「The American Dragon」的巨型完整暴龍化石，將於下月運抵香港展出，座落中環ifc任睇。將暴龍帶來香港的，是領賢慈善基金創辦人、嘉頓新抱張王幼倫，她分享這個機緣巧合的壯舉。
採訪：林妙萍
攝影：郭賢興
場地提供：China Tang（Landmark）
領賢慈善基金和ifc商場合辦「Meet The T. Rex」（探索暴龍世界）展覽，將於下月7日開始，作為期三星期展覽。張王幼倫指一切緣起每年一度的領賢活動，2018年最初只想做一場《侏羅紀世界：迷失國度》（Jurassic World：Fallen Kingdom）慈善首映，但最終卻搬了一條40呎暴龍來港。
三分一真骨
「因為領賢係提升教育同文化，我哋諗點樣可以喺首映加入教育元素，好彩好多朋友幫手，搭通天地線，搵到一條真暴龍化石運來，可以做一個展覽。今次活動目標唔係為籌錢，係希望大家都從中學到嘢，不只係睇吓條龍，佢絕種喇，而係探索龍嘅自然習性、氣候變化等好多科學現象，展覽有六個check points，各種各樣嘅知識。」
張王幼倫透露原先想借英國大自然博物館的恐龍化石，但因為恐龍骨正在巡迴展出，只能借出一條小恐龍骨，從來做事要做到盡的張王幼倫，最終反而找來更珍貴，全球從未曝光的暴龍化石The American Dragon。牠在北美洲出土，屬於私人收藏家所有，已簽約原定在歐洲博物館展出，現率先運到香港展覽，「五年前先喺美國掘出嚟，有超過三分一係真骨，好珍貴；呢條暴龍未出現過，今次拎到嚟，真係香港第一次。」高15呎的暴龍單單砌骨已要六天時間，「物流好複雜，要先喺德國由頭砌一次，make sure所有嘢fit，再拆晒，入箱，再運嚟，全個團隊嚟香港再砌過。」
暴龍以外，張王幼倫更搵來一枚暴龍牙化石，她展示長約8、9吋的牙，我哋搵埋隻牙，仲有一截埃德蒙頓龍脊骨，上面有個牙洞，就係暴龍咬落去嘅牙洞，你會見到佢哋咬合力有幾強，所以隻牙好關鍵。」另一枚暴龍大腿骨化石更可讓公眾親手去摸。
加獻暴龍牙
張王幼倫是珠寶設計師，最經典一役是設計當年電影《達文西密碼》（The Da Vinci Code）的寶物，2011年成立領賢慈善基金，曾在莫奈展覽中，閉館舉行慈善晚宴等。今次將於下月6日舉行展覽揭幕，之後舉行《侏羅紀世界：迷失國度》首映，「侏羅紀電影係經典電影，每個小朋友都鍾意。」她以往亦會帶仔女到英國逛博物館，今次女兒Amanda主力策劃教育部份，亦推出慈善義賣tee、恐龍公仔等。
展覽詳情
Meet The T. Rex探索暴龍世界展覽
展期：6月7日至27日（早上10時至晚上9時）
地點：中環ifc
費用：全免
展品：The American Dragon暴龍化石、埃德蒙頓龍脊骨、暴龍牙骨等
內容：六個互動展區探索恐龍奧秘、歷史小知識、AR擴增實境展覽點等。
更多精采時尚內容，盡在http://add.appledaily.com。
|
鍾意就快D Share啦！
|
|
|