「記得阿媽話：『我打你，我心痛呀！』」說這句話時，森美淚崩了！
「腦裏面記得媽咪跪喺度，同校長講：『你收我個仔』」30多年前媽咪跪小學校長的畫面，森美依然歷歷在目！
這就是－－偉大的母愛！
森美指媽咪只有小學程度，爸爸以前是消防員，小時候一家住在葵盛邨，森美媽咪跟普通母親一樣，都希望兒子入名校；直至兒子中大畢業，森美媽咪的心事已了，跟老公一齊學社交舞，去年參加英國黑池國際錦標賽打入12名；這天，森美欣賞父母跳舞，還跟媽咪學跳社交舞，很溫馨。
森美媽同森美早前一齊接受《蘋果》專訪，「佢細個身體弱啲，成日唔舒服，同埋佢係好鍾意駁嘴，你講一句，佢可以講好多句，你會好嬲。」說到兒時趣事，森美媽咪好氣又好笑，爆森美讀幼稚園上堂傾偈，被老師用膠紙黐嘴。森美說：「嗰時頑皮阿媽用藤條打我，咁我梗係走，鎖自己喺廁所唔畀阿媽打，仲記得自己點駁嘴：『你又唔係天主，點解你可以打我？』」回憶中的森美眼紅紅說：「大個發現細個怨得最多嘅嘢，就係阿媽最偉大嘅事，記得阿媽打完我，有時瘀咗…」森美崩潰爆喊：「阿媽幫我捽藥油，記得阿媽話：『我打你，我心痛呀…』」媽咪見兒子哭了，自己亦激動流淚說：「佢係一、二年班最曳，默書唔及格一分打一藤。」
望子成才的森美媽咪，坦言很想兒子入名校：「左右隔籬都話我，點解讀幼稚園已經離開屋邨，小學出九龍，我個心態，屋邨呢，我就驚佢群啲同學仔太犀利，一放學就玩。」當年她一早去聖芳濟各排隊攞報名表，可惜森美面試失敗，最後獲派荃灣天主教小學，返了3日學後，便帶兒子到聖芳濟各求校長。森美憶說：「我仲記得個畫面，媽咪跪喺度同校長講：『收我個仔』結果學校都有收我，好多謝校長。」媽咪卻笑說：「我只係記得教員室有個counter，前面有張凳，我就跪喺張凳度話見校長。你仲話：『阿媽，你唔好求啦，唔使求佢啦，我唔讀呢間學校啦。』」
之後森美由小五開始發奮讀書，曾就讀聖芳濟各書院、聖士提反書院、喇沙書院等名校，森美媽咪坦言：「嗰時最想佢讀好書讀好學校，到中學畢業佢話去理工讀設計，嗰時理工未係大學，我話梗係唔得你要做大學生畀我，我叫做責任完，做父母就係咁。」
雖然想兒子做醫生、律師，但森美卻入中大讀新聞與傳播學院，她說：「我冇失望，我個心係，你大學畢業就算嘞，最遺憾就係佢行大學畢業禮唔畀我去。」森美大笑：「去乜嘢，畢業禮我都冇去，我諗嘢好怪，唔想畀阿爸阿媽覺得有乜大不了，但佢哋覺得好緊要。」森美媽咪笑謂：「o依家要等個孫。」森美畢業後入了娛樂圈，問伯母有冇反對他入行？森美媽咪說：「冇，呢啲我唔識，係諗做得開唔開心，佢幾錢人工我都冇問㗎！後期…嘩，咁多，做」
數年前森美自爆曾患抑鬱，問到是否好擔心兒子？森美媽大呻：「哎呀！抑鬱我係睇報紙先知道，吓！我個仔病咩？啲朋友問我，我真係唔知喎！我問佢有冇睇醫生，我幫唔到佢。」森美解釋：「可能工作壓力大，嗰時自己知道病，都冇乜特別講，因為handle到。」問到森美是否孝順仔？媽咪說：「佢對父母係孝順，好關心你，得閒諗到搵爸爸媽媽食飯，唔係去搵朋友。」森美說：「好多謝媽咪，我由細到大都係曳、嘴硬，中一開始對得住阿媽，跟住又生仔，我都算孝順，但好多時候唔懂得表達情感，好少同媽咪講。」
攝影：葉君海
攝錄：Meng、葉君海
場地：DADA Bar + Lounge @ THE LUXE MANOR
| （左圖：森美提供圖片、右圖攝影：葉君海） | | |
| | | |
| | | |
| | | |
| | | |
| | | |
| | |
|
鍾意就快D Share啦！
|
|
|