2012年，Lady GaGa來港開騷，門票炒到天價咁高。拿督女莊思敏魚翁撒網式買飛，但都只係買到一張。事後佢話有人向佢兜售萬八蚊一張，最後莊思敏講價講到八千蚊一張，但佢最後都冇買，仲話：「我唔會助長歪風！」唔買黃牛，但係又同黃牛講價，相當之奇怪。
家底不俗嘅莊思敏，之前曾被傳有人想以1,200萬包養，莊思敏怒道：「我懷疑佢哋唔知我底細囉！」經濟不成問題，咁點解要放黃牛？
樂壇天王Bruno Mars嘅「24K Magic World Tour」昨晚亞博館舉行頭場。門票一票難求，但莊思敏卻有兩張今日尾場嘅飛，雖然係企位，但已羨煞旁人，但拿督女竟然唔要，仲擺上fb放售。每張$1,488嘅靚飛，莊思敏開價$5,200兩張！即係貴咗$2,224……咁貴手續費？
莊思敏前日喺佢個人fb出post「益老友」，因為set咗地球post權限，俾網民見到，圖已cap，附圖仲貼番佢當日話唔會助長黃牛買Lady GaGa飛嘅報道。
莊思敏話咁快已經刪post，網民惟有去佢個fb留言問價啦，有人問：「你唔係拿督女窮到買黃牛吖？」也有人稱：「我出$5,800唔好同我爭。」
《蘋果》致電莊思敏求證究竟佢係俾人借刀定係真係炒黃牛啦，佢直認件事係真嘅……：「呢個係一個誤會，係一個意外，因為其實我有個朋友，就買咗兩張飛。咁佢買番嚟嘅時候就已經係貴咗0架喇，咁佢就去唔到，想賣番出去，咁所以我哋都冇為意，其實佢係因為買貴咗，所以誤會我炒黃牛。」
莊思敏強調兩張門票唔係佢嘅，係佢朋友嘅，又指朋友係上網買嘅：「今次純粹都係因為幫朋友，所以先至一時手快。好快我就見到啲人留言，我先至：『係喎，佢買貴咗番嚟喎！』」又強調即使幫朋友放到飛，佢係一毫子利益都冇嘅。
|
鍾意就快D Share啦！
|
|
|