現年45歲的古巨基前晚在紅館舉行第二場演唱會時，不幸發生墮台意外，基仔消失十多分鐘後再上台繼續演出，完騷才去醫院檢查。基仔昨日凌晨拍片報平安，並交代跌下台時頸背落地，幸只是拉傷肌肉，覺得頸梗。基仔昨晚如常開騷，但昨午再拜神上香祈求演出順利。
久別紅館七年的古巨基，上周四開始舉行一連五場「WE我們世界巡迴演唱會」，前晚第二場基仔繼續坐時光機空降出場，基仔下台後跟觀眾揮手問好，後退時卻叉錯腳墮台，觀眾嚇呆靜默，及至消失十數分鐘後，基仔才再現身繼續表演。
基仔發生墮台意外後，台下的古太Lorraine飛身上前照顧，現場的聖約翰救傷隊人員也立即為基仔療傷，幸手腳並無大礙。前晚完騷後，英皇高層霍汶希（Mani）陪同基仔坐車到跑馬地養和醫院檢查。基仔昨日凌晨拍片上載社交網交代傷勢：「啱啱去咗醫院檢查，照咗磁力共振，我跌落地個位係頸背下邊，所以就照咗頸背位，啲骨係冇事，大家可以放心，醫生講係啲肌肉拉親，所以有少少梗梗哋，但呢個絕對唔影響我嘅演出，大家放心。」
華仔落車即上香
昨午大概4時，基仔、古太Lorraine及工作人員再在後台上香拜神，監製錢國偉上前向基仔了解傷勢，基仔指一下頭及腰。基仔看來精神不錯，但動作卻略生硬。記者問基仔痊癒了嗎？他即以手勢示意OK，問到可會減少舞步？他以口形表示會盡力。劉德華昨晚為基仔演唱會擔任表演嘉賓，華仔昨午5時許往紅館綵排，他下車後即向傳媒說：「我拜咗神先。」
基仔克服前晚墮台陰影，昨晚再上台演出，Mani、傅明憲和衞詩雅等捧場，全場爆滿。基仔昨晚8時40分開騷，他依然坐時光機現身唱出《爆了》，獲得全場歡呼，他說：「我架時光機今日去咗邊度？我記得啦，呢度係紅館嚟㗎。」其後站立時光機前再說：「畀啲聲我聽下。」基仔隨即在前台位置行來行去，並唱了《夢中人》。基仔跳舞雖未有太大動作，但唱歌及表現不失水準。
舞蹈員護過舞台
基仔唱畢後，由舞蹈員護着他行過時光機升降台，他搞笑說：「今晚要行過少少先，不過唔使太過嘅。」舞蹈員之後散開，基仔說：「作為一個戰士，梗會有啲傷嘅，邊度跌低，邊度企番起身。」他即行去跌落台位置，佢大力踩落去：「踩你！踩你！踩你！今晚有少少唔同，我想大家放心去睇跟住嘅表演。先嚟病歷報告先，噚晚完騷睇咗醫生，去咗檢查，骨冇事好企理，不過係向後跌，謝天謝地，落去嘅時候，好彩唔係頭係背脊，𠵱家背脊、膊頭、頸肩同頸前面脹脹地、梗梗地，頸肩肌肉紮實咗，可能會高音啲，可能好聽好多，大家可以放心去欣賞。」
採訪：盧妹
攝影：仇志德
|
鍾意就快D Share啦！
|
|
|