【《蘋果》專訪】奚秀蘭曾是《歡樂今宵》台柱，憑高䠷身形和半鹹淡廣東話成為開心果。不過，奚秀蘭日前接受本報專訪，自揭高度一度令她事業受阻，而她跟結婚39年富家子丈夫謝嘉亮也曾被棒打鴛鴦，丈夫為娶她而放棄家族生意。兩人現在婚姻幸福，令老爺另眼相看，她謂老爺後來更說：「都係娶番個高嘅好。」
加入娛樂圈半個世紀、現年68歲的奚秀蘭，近日為紀念入行五十年，首次推出卡拉OK碟《奚秀蘭50年經典珍藏卡拉OK原聲4D首版》。憑5呎6吋半高䠷身形成圈中高妹一族的她，日前接受本報專訪大談入行點滴，以及她跟富家子出身的丈夫謝嘉亮的「長短腳之戀」。
奚秀蘭在16歲時，曾參加藝員訓練班，但因太高而不獲簽約，直至翌年參加唱歌比賽取得冠軍入行，並加入無綫節目《歡樂今宵》（EYT），憑半鹹淡廣東話和高䠷身材令觀眾留下深刻印象。奚秀蘭說：「當時電視台，特別係老闆，唔鍾意人哋高，因為佢哋矮，佢哋認為『高妹』好難搵到拍檔。但做人唔可以自卑，我自我安慰，我覺得上台唱歌，夠高係會鶴立雞群，舞台上煞食啲，氣場唔同，人矮就拍電視劇OK。」
不計成本做好音樂
奚秀蘭今年為紀念入行五十周年，推出《奚秀蘭50年經典珍藏卡拉OK原聲4D首版》，為她出錢、出力最多的人，原來是丈夫謝嘉亮。奚秀蘭說：「我哋夫婦將僅有一筆基金捐出嚟，由做第一張專輯開始一路run住，收益就做慈善用途。我對音樂編曲要求都高，又要拍得靚，不計金錢。」
訪問當日，謝嘉亮一直為愛妻打點，兩人不介意「長短腳之戀」。原來謝嘉亮當年剛由英國讀書返港後為父親打理家族生意，在奚秀蘭哥哥牽紅線下，跟奚秀蘭一見鍾情，但就被謝嘉亮父親棒打鴛鴦，不惜用炒魷逼兒子分手，謝嘉亮最後為真愛離家出走，而奚秀蘭家人亦反對兩人交往，結果在沒有家人祝福下，依然於教堂行禮結婚。
奚秀蘭說：「老爺當年唔睇好我哋，佢話最多半年，或一年就離婚，最後睇到我哋結婚咁耐，佢最後拍住仔膊頭話『都係娶番個高嘅好。』」娛圈過去亦有不少「長短腳之戀」夫妻，奚秀蘭說：「王祖藍同李亞男拍拖時，都有同我老公講『大姐夫，我以你為標準。』終於佢爭取到。」
先天問題無法生育
奚秀蘭早前與老公到日本賞櫻慶祝結婚39周年，她說：「當年都好多磨擦同拗撬，每個人都會講錯嘢，但唔好咁執着。如果想愛情成功美滿，每個人都要付出代價，我哋之間互相包容、接納。」講到二人婚後未有生育，奚秀蘭解釋：「我先生有先天問題，影響生育，佢結婚第一年知道後好傷心，喊晒話『將來老咗，冇人送終。』查理斯王子話婚姻係為咗share your life，唔生BB都冇遺憾。我哋婚姻係分享對方生活，咁先有意思。我淨係陪住老公，就好似湊一個大仔咁，我都湊咗佢39年咯。」
採訪：楊定
|
鍾意就快D Share啦！
|
|
|