藝人李蘊（Renee）已懷孕7個幾月，她在網上甫出一張超聲波相，仲好開心話：「Hello 小胖胖！」又叫大家估吓係「小胖子家小胖妹」！剛剛收到消息，Renee今次生仔，和兩歲大的囡囡羅紫晞湊成一個「好」字，真係恭喜佢。
李蘊日前更影了數輯大肚相，相中她肚大如籮，但手腳纖瘦，面容輪廓分明，依然係靚女，不過她的大肚相跟名模Jessica C.裸體大肚相比，就保守得多，頂多只有一套較性感是穿上bra top紗裙及短褲露肚皮，而囡囡晞晞就相當可愛，穿上粉橙色裙仔，似足公仔一樣。
Renee接受東網電話訪問時說：「我上一胎喺香港生，每個月都會返嚟香港做產檢，7月度就會返嚟香港住，住多幾個月，到8月尾喺香港生埋囝囝，坐埋月先再返廣州，我都會帶埋囡囡返嚟，因為我唔可以同個女分開太耐，否則我會掛住佢，老公就等我生時先嚟香港陪我囉。」問她為何老公沒一起影，她哈哈笑說：「咁我上一胎佢都冇影，因為我老公低調啲，佢唔係好鍾意影相，佢負責睇靚相就得啦。」又指今次影大肚寫可謂「快、靚、正」，她又說：「呢輯相我前日先影，第一次同呢個攝影師合作，佢影得勁快，影完第二日已經有相攞，過程好開心，好舒服，好滿意呢輯相。」
信囡囡唔會呷弟弟醋
問到為何不影性感相？她頻說：「吓，我唔得㗎，我唔可以咁性感，一嚟我結咗婚，二嚟要性感，以前都影過比堅尼嗰啲啦，依家大住個肚，都唔使成個肚皮打晒出嚟，咁人哋外國人（Jessica C.）開放少少㗎嘛，最重要係靚啦，咁靚唔靚先？」又說囡囡成日攬住她的大肚，相信囡囡好期待弟弟出世，覺得囡囡年紀尚細，應不會有妒忌心呷弟弟醋，且兩姊弟年紀近可一齊成長，相信不會鬧交及打交。
Renee又好感恩可以湊成一個「好」字：「個天對我太好，生完個女就畀個仔我，其實初頭以為都係生女，兩個女都冇問題，但湊個『好』梗係最好啦。（係咪繼續生？）我冇所謂，但老公覺得兩個夠，睇天意啦，我仲後生，所以過多幾年或十年都仲可以生。」
|
鍾意就快D Share啦！
|
|
|