薛家燕二仔石耀庭（Jackson）今日小登科，娶新抱Zoe，今晚喺尖沙嘴洲際酒店舉行婚宴，擺咗53圍，喺眾賓客入座後，一對新人喺台上同賓客打招呼，然後新郎攞住個手機嚟讀稿致辭，佢對住任職老師嘅老婆話：「能夠娶到係我福氣，呢一年嚟辛苦你又要返學，又要籌備婚禮，一定好辛苦，不過我哋經歷到，撐咗過去，我相信以後冇嘢難到我哋，多謝你愛錫我同保護我，我會永遠照顧你、保護你，俾你有最大嘅幸福！I Love You！」
Jackson數度因為感觸落淚而講唔到落去，Zoe就幫老公印眼淚，Jackson又感激外父外母、公公、婆婆咁辛苦養育一個咁靚、咁善良又細心嘅Zoe。Jackson又答謝媽咪，佢話：「我自細喺單親家庭長大，媽咪好辛苦帶住我哋三個仔女，佢好努力工作，多謝媽咪！」致辭完畢，一對新人同台下家燕姐都忍唔住爆喊。
新任奶奶家燕姐台上致辭，佢一度開心到講錯係自己結婚咁，佢話：「好多謝大家百忙中嚟出席我今日……我個仔個婚禮。」連家燕姐都忍唔笑，佢話：「對唔住，我呢排成日噏錯。」佢多謝朋友由遠道返嚟，再講到獨力養育三位子女嘅辛酸：「大家都知20幾年我啲仔女好細時，我啲日子唔係咁平坦，個個幾歲大，我擔心唔知點養大佢哋，又擔心自己唔知紅得幾耐，可能一兩年冇嘢做，所以好有壓力。」家燕姐話好彩仔女生性聽話：「在座好多影視界朋友都係我恩人，冇你哋支持，冇你哋愛戴，我三個仔女唔會有咁順風順水嘅路去行。」
家燕姐又話：「我有時做嘢都好糊塗，趕幾組又遲到，大家都好包涵接納我，可以令到Jackson去留學，學成歸來，今日事業有成，重可以成家立室，我真係好開心。」講到呢度家燕喺台上爆喊。家燕姐話Jackson已經係一家之主，叫佢要愛錫太太，又再次大讚有個好新抱。
之後七公主成員馮素波、陳寶珠、王愛明同沈芝華都有上台致辭，寶珠姐話：「七公主裡邊大家姐同家燕係最識講嘢，我同芝華同明明都係咁樣咁樣（意指講說話唔叻），今日家燕做奶奶，係好值得恭賀，你睇佢笑到吖，我淨係見到佢啲牙，見唔到佢對眼，我哋幾姐妹都戥佢開心，我哋祝新郎新娘永結同心，白頭到老，孝順奶奶，孝順外父外母，快啲生個BB俾家燕抱孫，佢好恨抱孫。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|