現年80歲嘅資深演員夏萍(Apple姐)，15年10月喺獨居嘅九龍灣寓所跌倒10個鐘後被送院，留院17日之後，由梁健平同一個女性朋友送佢出院，而Apple姐個女就因為扭傷腳未能出現。當日Apple姐坐住輪椅精神奕奕出院，梁健平就話安排咗看護人員送飯同定時幫Apple姐打針。（相關新聞： https://bit.ly/2uLgbHQ ）據知Apple姐因為對腳有事行動不便，所以出院之後就入咗老人院住，方便有人照顧。
事隔兩年多以嚟，Apple姐一直調養身體冇公開露面，直至7月23日，有讀者就喺葵涌石籬邨一間茶餐廳撞見Apple姐同朋友食晏。讀者潘先生日前透過《蘋果》嘅「爆相爆片」話：「今天在石籬上班，放lunch食飯時望過隔離枱就見到一個超精靈嘅老人家，睇真D原來係夏萍姐，好開心見到她可以自己食東西不用餵，希望她一直都咁健康精靈。」
睇番潘先生提供嘅片段，Apple姐當時同一位女性朋友喺茶餐廳開餐，佢戴住紅色cap帽同披住條紅色披肩，枱面上放咗副太陽眼鏡，見佢一手揸匙羹一手捧住個碗仔自己食嘢，食兩啖又同朋友吹水，雖然當時Apple姐坐住輪椅，但精神相當唔錯。
《蘋果》打過電話畀Apple姐，但佢嘅電話號碼已經停止使用，而《蘋果》聯絡梁健平時，佢話Apple姐現時入住老人院，並且cut咗手機，想安安靜靜生活唔畀人騷擾。梁健平話：「我近排只係同佢電話聯絡過，佢話自己情況OK，佢話自己肥咗㖭！大家唔駛擔心。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|