人會變，呢句說話康仔深信不疑，尤其係隨住年齡增長，男男女女對另一半嘅要求都會產生變化。就講我朋友阿蚊，model身材加埋個樣有少少似薛凱琪，後生嗰時都不知幾多仔追。聽講佢喺大學時代嘅男友錫到佢燶，偏偏阿蚊就嫌呢位前男友唔夠上進，最後分手收場。
眨吓眼，阿蚊已經踏入適婚之齡，近年睇佢IG，經常都見佢po相放閃，能夠馴服到阿蚊，相信呢位仁兄肯定係唔嘢少。早排舊同學聚會見返阿蚊，原來佢都唔係康仔諗得咁幸福......
「幾時結婚呀？我見你男朋友好似好錫你喎！」
「佢錫我？有次我夜晚自己返屋企，有個癲佬跟尾，突然間衝上前踢咗我一腳，我驚到跑埋一邊報警，call埋男朋友嚟幫手，你估吓跟住點？」
「點呀？」
「佢（男友）嚟到之後冇安撫我不特止，仲狂鬧我，話我因咩事要搞到報警咁大陣仗！」
「吓？佢唔擔心你㗎咩？」
「我唔覺囉！仲有一單，我試過睇佢電話，見佢用同樣嘅message send畀十幾個喺Tinder識返嚟嘅女仔，約佢哋出街。」
「咁呢單嘢佢點拆呀？」
「佢話做緊個research，要搵啲女仔study吓......」
「唔係信呀？」
問得深入啲，原來阿蚊男友都係窮L一名，可能你會問，咁阿蚊因咩事仲跟佢呢？好簡單，當一個女人有返咁上下年紀，就想安定落嚟，希望另一半會變乖、變好，然後拉埋天窗。畢竟經歷過咁多段戀情，要重新再去適應另一個真係好攰，康仔係完全明白阿蚊嘅！
康仔最後拋咗個問題畀阿蚊，問佢有冇後悔飛咗大學時代條仔，阿蚊二話不說答「有」......
「細個梗係想揀吓，試吓唔同嘅男仔喇，不過如果可以返轉頭，我絕對唔會飛佢，而家都有啲後悔。」
人就係咁，唔同時間遇到唔同嘅對象，係會有唔同嘅結果。好多人最愛嗰個都未必係同自己長相廝守嗰個，但往往就係因為「想試」、「想轉」而錯過一生中最愛。
老土啲都要講句，珍惜眼前人，唔好因為少少事就嗌分手，因為能夠搵到個真心相愛嘅人，真係唔易。
專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。
Facebook專頁：
https://www.facebook.com/mynameishonghong/
立即下載Apps，隨時隨地睇盡時政專題、深度偵查、娛樂熱話！
按此連結：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|
