隔離team同事阿興出名係大滾友，即使有老婆依然沙沙滾，據聞佢每個月去風月場所嘅洗費接近5位數。
成日都話「點玩都好，最緊要識得返屋企」，康仔咁睇，出得去玩已經唔啱，若果玩完、梳乎完仲唔識得對老婆好啲，咁呢個男人，又應該話呢段婚姻，已經係去到末期。
唔知大家身邊有冇朋友，係永遠都唔會po另一半嘅相上社交網站嘅呢？阿興就係呢種人！有人會話，因為阿興想搵食，所以扮單身！起初康仔都係咁諗，但自從喺尖沙咀撞過佢兩公婆之後，康仔就知咩原因。
事緣某日下晝喺海港城見到阿興，佢身後有位睇落大佢10年嘅女人跟尾，當我上前同阿興打招呼嘅時候，阿興冇介紹呢位女士畀我識不特止，位女士仲好有默契咁自動波衝前走咗去。康仔之後諗咗好耐，究竟呢個女人係咩人？係阿興嘅姨媽定抑或係工人呢？呢個疑團，好快就由另一位同事Oliver解開咗！
「Oliver，阿興有件跟班咁把炮嘅？」
「跟班？係咪頭髮長長、戴眼鏡，睇落老阿興好多？嗰個係佢老婆嚟！」
康仔聽到之後，心入面有種好sad嘅感覺，因為佢老婆當日咁樣一支箭標咗去，加上阿興又唔介紹，即係話呢種拍拖模式已經成為習慣，阿興係從來都唔會介紹佢老婆畀人識，驚死冇face咁款。
查實你娶得個老婆返嚟，就應該要愛惜佢、承認佢嘅地位，阿興連對老婆嘅基本尊重都冇，我覺得係佢襯唔起老婆多啲。呢啲咁嘅賤男，話畀人知係我同事就真係搞到康仔冇face嘞！
專欄作者簡介：
康仔
日頭返工攤抖，例牌遲到早走，收工約Friend飲酒，放假陪女玩狗。
一日冗員，一世冗員，我是康仔。
Facebook專頁：
https://www.facebook.com/mynameishonghong/
來源 source: http://nextplus.nextmedia.com
|
鍾意就快D Share啦！
|
|
|
