人生在世，真係需要能量正，如果唔係呢一生已經輸咗九成。好似黃翊咁吖，幾多難關，難過到講亦講唔清，但係只要唔放棄對夢想嘅熱誠，即使年屆50，依然可以好似不死鳳凰，重返樂壇出歌兼開演唱會，人生起跌好似粵語長片，都可算係幻海奇情。
雖然提起黃翊，年輕一代可能會誤會講緊嘅係內地女星黃奕，或者小說家黃易。不過如果講明係坎坷經歷多到可以參加「鬥慘比賽」，睇怕都冇人夠呢位頭髮長長，心地善良嘅未婚人爸Fight。
不忍愛人捱刀
黃翊八十年代做歌手嗰陣，曾被傳媒封為張國榮接班人，連哥哥都作過曲畀佢唱，個頭開得鬼死咁靚。可惜吖，後來同黃寶欣拍拖，被公司棒打鴛鴦，廿歲仔至嚟初戀嘅佢，沉晒落去，有女萬事足，搞到被掟入雪櫃，初頭都有返內地登台搵兩餐，後尾雪到連人氣都冇埋。輾轉之下仲去咗做小販同大牌檔樓面，堂堂名歌星被打回原形，嘗盡人情冷暖、高低起跌。
咁都未算，好唔容易喺大埔街市搞嘅大牌檔做到上咗軌道，點知老婆陳存正就有腎病，為咗愛妻，試過一個月使二十萬醫藥費，黃翊跑數跑到氣咳，夠悲情喇啩？未算，黃翊捱到椎間盤突出，佢大家姐、二家姐同四家姐仲先後因為爆血管、肺癌同淋巴癌離世，真係稍為脆弱少少都頂唔住。
二千蚊點夠交租供車？
雖然有口痕友話，黃翊同陳存正連仔都生埋都唔結婚，好人極有限。不過事實係黃翊想結婚，亦想捐腎救老婆，只係陳存正同傳媒講：「唔想見到心愛嘅人要捱一刀或者手術後唔舒服。」情願自己每日辛苦啲洗腎，仲話醫生指洗腎可以洗到二、三十年，陳存正話：「活多二、三十年都夠皮喇！」眼淺啲都畀佢兩公婆搞到拎紙巾。
話時話，黃翊當年都試過流下男兒淚。話說佢起初都接受唔到要擺街邊做小販，但係又要交租同供車，陳存正話佢知：「我哋戶口剩番二千蚊咋。」結果兩個攬住爆喊，係名副其實嘅窮到喊呀！
黃翊又要照顧患病老婆，又要父兼母職湊囝囝，最近忙綵排演唱會之餘，更加要返大牌檔幫手，少啲責任感都頂唔順，其實佢話晒都叫重返咗樂壇，有需要嘅時候可以閃走㗎喎，但佢冇， 仲話：「我執枱掃地有乜問題？我為屋企人咁做，我覺得自己好Man 。」
想郁手打老婆？
不過咁，呢位「好Man」都有想郁手打陳存正嘅時候。黃翊回想邂逅老婆一幕：「當年登台坐直通車，全人類等個叫陳存正嘅人，心諗：『條友嚟到我一定打鑊佢。』點知原來係個肥妹仔，不過拍拖之後瘦番晒！」
所以話呢，做人真係需要能量正，黃翊面對逆境，記住咗佢老婆個名︰要「存」有「正」能量，唔止歌手身份可以復活，老婆可以由肥妹仔變瘦妹仔，連身體病痛都一樣可以克服啫！
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
