羅嘉良同郭晉安喺1999年前合作拍嘅長劇《創世紀》，曾經掀起一陣熱潮，就算之後重播幾多次，依然有捧場！事隔19年，無綫喺前年宣佈開拍《創世紀》續集《再創世紀》，不過今次係愛奇藝合作，聲稱係作為香港回歸20周年、TVB 50周年獻禮。
雖然呢套劇因為批文問題而要延遲，不過喺改完又執嘅情況下，終於播映有期，原來今次之所以執得咁嚴，因為呢套劇會喺愛奇藝同CCTV-8播出，噚晚開始，大陸嘅觀眾佔盡優勢，可以先睹為快咁煲劇。
話晒呢套劇有30幾集，o依家叫做啱啱開始，劇情講郭晉安飾演嘅賀天生想借住金融海嘯而吞併胡楓嘅集團，點知因為黃子雄呢個敗家仔，受損友嘅影響下，拎公司嘅股份做抵押去投資，結果喺幾乎賠上成個集團，不過好彩喺林文龍同潘志文嘅幫助下，總算捱過呢關，之後劇情講安仔點樣用盡方法，要爬上首富呢個位！
跟住劇情發展當然仲喺蘊釀，暫時都未知成績係點，但係做慣好人嘅安仔，似乎有啲驚喜，今次同《致命復活》唔同，故事一開始已經feel都安仔奸奸哋，成個感覺有啲「笑面虎」同埋奸角「小丑」，明明係笑笑口對住你，但係總係覺得有啲心寒！
安仔噚日接受《蘋果》訪問，佢話：「哈哈，咁都俾你睇到！我都覺得我真係進步咗！其實今次我想做一個可愛又令觀眾鍾意嘅奸角，男性觀眾希望覺得係咪應該都好似賀天生咁，做人圓滑少少會好啲。而女性觀眾會覺得有個咁嘅男朋友又或者老公都唔錯呀！咁努力搵錢。」
另一方面，林文龍同鍾嘉欣飾演情侶，本來唔少觀眾以為佢哋可以繼《法證先鋒》再續前緣，點知因為嘉欣嘅父母因為投資失敗而自殺，嘉欣覺得一切都係因為林文龍，所以最後失咗蹤，唔知最後嘅結局係點呢？
|
鍾意就快D Share啦！
|
|
|
