暑假放完喇！學生哥聽日就要準備開學，家長當然係最忙嗰個，尤其係讀傳統學校嘅小朋友，家長要幫忙準備書簿、校服同檢查小朋友嘅暑假作業等等，真係好唔得閒。
照顧一個小朋友都咁辛苦，何況四個呢？！
38嘅林盛斌（Bob）最近發現有三條心臟血管塞咗，立即入院做通波仔手術，現階段要好好休息。（相關新聞﹕ https://bit.ly/2LIB3oO ）咁子女開學呢啲問題，就要靠晒老婆黃乙頤（Pearl）喇，日前《蘋果》到訪Bob位於旺角嘅逾千呎豪宅做訪問，一入屋已見到三位活潑好動，分別10歲嘅霏兒（Faye）、6歲嘅熹兒（Haye）同3歲嘅機兒（Kaye）跑來跑去，又喺梳化跳上跳落，非常之開心。而最細弟弟，剛滿1歲嘅道申（Jaye）就留喺房間瞓覺豬。大家姐霏兒話：「暑假作業大部份喺學校做晒，較難嗰啲，之前去到加拿大先做。」
Bob一家早前到加拿大一個月放暑假，讓女兒參加Rocket camp，教授基本火箭製作過程，霏兒好興奮咁拎出製成品show畀大家睇。Pearl話：「冇額外畀練習佢哋做，向來唔想俾仔女太大壓力，只要唔係最差嗰個就OK。不過大家姐今年讀小五，要考呈分試，都要逐步增加（練習），唔係太懶散又唔得。」點解選擇傳統學校？Pearl話：「我哋都係傳統學校出嚟，紀律會嚴謹啲，想佢哋學好基本嘅中文、普通話，如果想佢哋英文好啲就再俾啲courses佢哋上，等佢哋大啲先再作其他選擇。」
Pearl早前推出一本《學生仔手冊》講父母湊子女苦與樂，Pearl話最希望小朋友學懂珍惜，佢話﹕「通常妹妹都會跟埋家姐讀同一間學校，但我都要二妹同三妹去考入學試，我每次都報考七、八間，等佢哋知道讀書係要過五關斬六將，當年大家姐都要考試，要俾佢哋知道幸福唔係必然。」至於校服同書簿，Pearl亦堅持一個留一個，佢笑笑口話：「其實我都會掉嘢，但校服同書簿真係專登留嘅，尤其係幼稚園，除咗校服要改少少，書薄都好新正，因為以前有包書，所以保存得好好，每本書嘅名都係一個個貼上面。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|